«Գրեթե նորակառույց դպրոցը՝ փակվողների ցանկում». կրթության փորձագետը՝ Արտամետի՝ Գուրգեն Մարգարյանի անվան դպրոցի մասին

Արմավիրի մարզի Արտամետ գյուղի դպրոցը շահագործման է հանձնվել 2012 թվականին, ունի դահլիճներ, լաբորատորիաներ։ Այդուհանդերձ, ինչպես «Փաստինֆո»-ի հետ զրույցում ասաց Ազգային կրթության խորհրդի անդամ, կրթության փորձագետ Արմեն Ներսիսյանը, տվյալ դպրոցը ներառված է փակվող դպրոցների ցուցակում։

Ուշադրության է արժանի նաև դպրոցի անունը․ այն անվանակոչված է Հունգարիայում Ռամիլ Սաֆարովի կողմից սպանված Գուրգեն Մարգարյանի անունով։ Թե որքանով է դպրոցի անունը դեր խաղացել դպրոցների փակման ծրագրում հայտնվելու հարցում, հաստատող որևէ հիմք չկա, սակայն, ըստ փորձագետի, հենց գյուղի բնակիչներն են իրենց տրամադրել դպրոցի նկարներն ու տարակուսել, թե ինչպես կարող է գրեթե նորակառույց, լաբորատորիաներով ու դահլիճներով ապահովված, նոր շենքային պայմաններ ունեցող դպրոցի շենքը դատարկվել, իսկ հարևան գյուղում մեկ այլ դպրոց զրոյից կառուցվել։

Գյուղի բնակիչները նաև տեղեկացրել են փորձագետին, որ երբ դպրոցի փակման որոշման մասին լուրը հասել է ծրագրի հաստատման փուլում, երեխաներին մեկ շաբաթ դասի չեն թողել՝ հավանաբար աղմուկից խուսափելու համար։

«Ցանկերը հաստատվել են, հետո դրանք հասցվել են առանձին դպրոցների։ Յուրաքանչյուր գյուղում այդ պահին կարծել են, որ խնդիրը միայն իրենց է վերաբերում, ու թե՛ շոկից, թե՛ մենակության զգացումից այդ պահին չեն աղմկել, բայց հետո հասկացել են, որ ընդհանուր ծրագիր է։ Արտամետը կոնկրետ սահմանամերձ դպրոց չէ։ Հաստատված ցանկի 239 դպրոցներից 55-ը սահմանամերձ են, բայց միևնույն է՝ երբ դպրոցը դատարկվում է, այն դառնում է ավերակ, գյուղը՝ նույնպես։ Գյուղը երեխաներով է գյուղ»,- ասում է փորձագետը։

«Փաստինֆո»-ն փորձել է հարցի վերաբերյալ մեկնաբանություն ստանալ դպրոցի տնօրինությունից, որտեղից վստահեցրել են, թե նման բան չկա, իրենց դպրոցը չի փակվելու։

Նման պատասխանը, կրթության փորձագետի կարծիքով, տարածված վախի մթնոլորտի արդյունք է։

«Ասում են՝ շառից-փորձանքից հեռու, թող մեկ ուրիշը բարձրաձայնի»,- ենթադրում է փորձագետը։