Նմուշառում է կատարվել ջերմուկից, որի լաբորատոր փորձաքննության արդյունքում շեղումներ չեն հայտնաբերվել. ՍԱՏՄ

Մայիսի 28-ին Ռոսսելխոզնադզորը հայտարարություն տարածեց, որ 2026 թվականի մայիսի 30-ից ժամանակավոր սահմանափակումներ է մտցնում Հայաստանից արտահանվող թարմ լոլիկի, վարունգի, պղպեղի, կանաչեղենի և ելակի ներկրման վրա՝ մինչև արտահանվող արտադրանքի անվտանգության ապահովման համապատասխան ալգորիթմի մշակումը։ Տարածված հաղորդագրության մեջ նաև Ասվում էր. «2026 թվականի մայիսի 21-ից մայիսի 27-ն ընկած ժամանակահատվածում Ռոսսելխոզնադզորն ստուգումներ է անցկացրել Հայաստանի ձեռնարկություններում, որոնց ընթացքում հայտնաբերվել են մի շարք խախտումներ, այն է՝ ջերմոցային համալիրներում ԵԱՏՄ անդամ պետությունների համար կարանտինային օբյեկտների առկայություն, ինչը հաստատվում է հայկական մրգի և բանջարեղենի ներկրման ժամանակ դրանց հայտնաբերման պարբերական դեպքերով՝ 181 դեպք 2026 թվականի ընթացքում»։ Panorama.am-ը պարզաբանում ստանալու նպատակով դիմեց Սննդամթերքի անվտանգության տեսչական մարմին։

ՍԱՏՄ Իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը պարզաբանեց.

«ՀՀ սննդամթերքի անվտանգության տեսչական մարմինը մայիսի 28-ին ՌԴ Անասնաբուժական և բուսասանիտարական վերահսկողության դաշնային ծառայությունից («Ռոսսելխոզնադզոր») ծանուցում է ստացել այն մասին, որ 2026 թվականի մայիսի 30-ից ժամանակավոր սահմանափակումներ են գործելու Հայաստանից արտահանվող թարմ լոլիկի, վարունգի, պղպեղի, կանաչեղենի և ելակի ներկրման նկատմամբ:  

Տեսչական մարմնի ղեկավարը սկսել է բանակցությունները գործընկեր կառույցի հետ, արդյունքները կհրապարակվեն առաջիկա շաբաթվա ընթացքում:   Հայկական բուսաբուծական և ձկանբուծական ձեռնարկություններում մայիսի 21-ից մայիսի 27-ը ռուս գործընկերների հետ համատեղ անցկացված ստուգումների արդյունքները դեռևս չեն ամփոփվել:

Քանի որ Ջերմուկի շրջանառությունը կասեցրել է ՌԴ սպառողների իրավունքների պաշտպանության ոլորտում հսկողություն իրականացնող դաշնային ծառայությունը («Ռոսպոտրեբնադզոր»), խնդրի կարգավորմամբ զբաղվում է ՀՀ Էկոնոմիկայի նախարարությունը:  

Միայն կարող ենք տեղեկացնել, որ, ՍԱՏՄ-ն նմուշառում է կատարել ջերմուկից, որի լաբորատոր փորձաքննության արդյունքում շեղումներ չեն հայտնաբերվել. «հիդրոկարբոնատ», «սուլֆատ» և «քլորիդ» իոնների քանակը համապատասխանել է Մաքսային Միության տեխնիկական կանոնակարգերով սահմանված նորմերին: