Խորին երախտագիտություն ամենքիդ, որ աղոթքով ու զոհողությամբ ընդունեցիք եկեղեցու իրականությունը, որտեղ ազատությունն ու պարտականությունը համընկնում են ճշմարտության մեջ. Իսահակ Սրբազան

Եկեղեցու կյանքում տեղի ունեցող իրադարձությունները չեն կարող ընկալվել զուտ պատմական կամ վարչական փաստերի պարզ հաջորդականության սահմաններում։ Դրանք պատկանում են այն կարգին, որտեղ պատմությունը ինքնին դադարում է լինել ինքնաբավ իրականություն և ծավալվում է դեպի այն իմաստը, որը չի հառաջանում սոսկ մարդկային կամքով, այլ ընդունվում է որպես «նախագոյություն», այս մասին գրել է Գեղարքունյաց թեմի առաջնորդական տեղապահ Գերաշնորհ Տ․ Իսահակ եպիսկոպոս Պողոսյանը։

Այս իմաստով, ըստ Սրբազան Հոր, Եկեղեցին մշտապես նախորդում և գերազանցում է տեսանելի իրականությունը՝ մեկնվելով հաղորդության խորքը։

«Ուստի Եկեղեցին չի կարող ընկալվել սոսկ որպես կազմակերպական միավոր կամ ինքնակառավարվող ինստիտուտ։ Նրա էությունը ոչ թե կառավարման տրամաբանության, այլ՝ հաղորդության մեջ է։ Հետևաբար, Եկեղեցու յուրաքանչյուր «իրադարձություն» իրականում դատողության առարկա չէ միայն արտաքին դիտարկման համար, այլ պահանջում է ներքին հայեցում՝ հավատքի տրամաբանությամբ, որտեղ տեսանելին միշտ մատնանշում է անտեսանելին, իսկ ժամանակավորը՝ հավիտենականը։ Այդ պատճառով էլ ցանկացած մասնակցություն, նույնիսկ այն, որն արտաքինից կարող է թվալ աննշան, իր մեջ ունի հայտնութենական և փրկագործական արժեք։

Այսու՝ խորին երախտագիտություն ենք բերում ամենքիդ ու բոլորիդ, որ նախընթաց ժամանակահատվածում ու այս օրերին Ձեր աղոթքով ու լռությամբ, համբերությամբ ու զոհողությամբ, մասնակցությամբ ու պատասխանատու գիտակցությամբ ընդունեցիք Եկեղեցու իրականությունը, որտեղ ազատությունն ու պարտականությունը ոչ թե հակադրվում, այլ համընկնում են ճշմարտության մեջ։ Այդ համընկնումը կամ համաձուլումը հնարավոր է միայն այնտեղ, որտեղ կամքն այլևս չի ընկալվում որպես ինքնահաստատում, այլ պատասխան, հաղորդություն և վկայություն։

Թող Բարի Աստված ամուր և զորավոր պահի ամենքիդ Ձեր բարի և ազնիվ փափագների իրականացման ճանապարհին՝ ի սեր հայրենյաց, ի պայծառություն Սուրբ Եկեղեցվոյ և ի փառս Ամենասուրբ Երրորդության։ Ամեն»,- նշել է Իսահակ Սրբազանը։