Հարկավոր է ճիշտ բանակցել ճիշտ մարդկանց հետ, ունենալ հզոր դաշնակիցներ, փակել պատերազմի դուռն ու զբաղվել երկրի զարգացմամբ. Ծառուկյան

«Բարգավաճ Հայաստան» կուսակցության առաջնորդ Գագիկ Ծառուկյանն ու կուսակցության անդամները, աջակիցները նախօրեին քարոզարշավի շրջանակում նախընտրական հանդիպում և քայլերթ են ունեցել Երևանի Մալաթիա-Սեբաստիա վարչական շրջանում։

«Քաղաքամայր Երևանի բոլոր վարչական շրջաններում քաղաքացիների ջերմ ընդունելությունն ու վստահությունը մեզ համար մեծ պատասխանատվություն են։

Այս օրերին մարդկանց հիմնական ցանկությունը մեկն է՝ ապրել խաղաղ, անվտանգ և բարեկեցիկ երկրում, սեփական աշխատանքով ապահովել ընտանիքի արժանապատիվ կյանքը։

Հենց այս նպատակով էլ «Առաջարկ Հայաստանին» ծրագրի հիմքում խաղաղության երաշխավորումն ու սոցիալական արդարությունն են, որովհետև միայն այդ ճանապարհով կարող ենք կառուցել անվտանգ և բարգավաճ Հայաստան»,- գրել է Գագիկ Ծառուկյանը։ 

Քաղաքացիների հետ հանդիպման ժամանակ Գագիկ Ծառուկյանն ասել է. «Բոլորիս ուզածը մի բան է՝ խաղաղություն լինի, տնտեսությունը զարգանա, բարեկեցություն լինի, մարդիկ կարողանան արդար քրտինքով աշխատել, ստեղծել ու ապրել»։ 

«Չլուծվող խնդիր չկա, հարկավոր է ճիշտ բանակցել ճիշտ մարդկանց հետ, ունենալ հզոր դաշնակիցներ, խնդիրը կարգավորել, պատերազմի դուռը փակել ու զբաղվել երկրի զարգացմամբ»,- ընդգծել է Գ.Ծառուկյանը։