Վարդան Ղուկասյանի որդին ևս 3 ամիս կմնա կալանքի տակ

Տնային կալանքում գտնվող Գյումրու քաղաքապետ Վարդան Ղուկասյանի որդին՝ Սպարտակ Ղուկասյանը, կմնա կալանավորված։ Դատախազությունից 1lurer.am-ին հայտնել են, որ Սպարտակ Ղուկասյանը 3 ամսով կալանավորվել է։

5-րդ ալիքը գրում է, որ  Ղուկասյանի խափանման միջոցի հարցը պետք է քննվեր հաջորդ ամիս, սակայն դատախազությունը արտահերթ նիստ նշանակելու միջնորդություն էր ներկայացրել: 

Սպարտակ Ղուկասյանի փաստաբան Հովհաննես Ղարաքեշիշյանն ասել է, որ դատական նիստն անցկացվել է առանց Ղուկասյանի պաշտպանների մասնակցության. «Ծանուցում ենք ստացել դատական նիստի նշանակման մասին, սակայն հայտնել ենք, որ չենք կարող մասնակցել՝ ծանրաբեռնվածության պատճառով»։

Սպարտակ Ղուկասյանին մեղադրանք էր առաջադրվել 2025-ի նոյեմբերին:  Այդ օրը ՔԿ–ն հայտնել էր, որ նախաձեռնված քրեական վարույթի նախաքննության ընթացքում 1 անձի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով կատարված խուլիգանությունը):