Սերգեյ Շոյգուն Հայաստանին խորհուրդ է տվել ընտրել այն գնացքը, որը համապատասխանում է երկրի և ժողովրդի ճանապարհին

«Գուբերմանի հայտնի մի բանաստեղծություն կա․ Չի կարելի նույն տեղում նստել տարբեր գնացքների վրա։ Այդ պատճառով, այնուամենայնիվ, պետք է ընտրել այն գնացքը, որը քո ճանապարհին է։ Քո երկրի ճանապարհին, քո ժողովրդի ճանապարհին», — ասել է Շոյգուն՝ պատասխանելով լրագրողների հարցին Հայաստանի՝ ՀԱՊԿ անդամակցության և եվրաինտեգրման ծրագրերի վերաբերյալ։

Նա ուշադրություն է հրավիրել այն հանգամանքի վրա, որ Հայաստանը դեռևս մնում է ՀԱՊԿ կազմում, սակայն կազմակերպության Անվտանգության խորհուրդների քարտուղարների կոմիտեի այսօրվա նիստը կրկին անցել է Երևանի ներկայացուցիչների մասնակցության բացակայությամբ։

Շոյգուն նշել է, որ Արևմուտքի երկրների հետ Հայաստանի ամուր ձեռքսեղմումներից հետո Ռուսաստանն այժմ հասկանում է, թե ինչու ավելի վաղ Հայաստանի սահմաններին հայտնվեցին եվրոպացի դիտորդներ։

Նա նաև ընդգծել է, որ Հայաստանը հրաժարվել էր Ադրբեջանի հետ սահմանին ռուս դիտորդներից, սակայն այնտեղ հայտնվեցին Եվրամիության դիտորդները։

«Առաջին փուլում ասում էին, թե դա երկար չի տևելու՝ մինչև ամեն ինչ հանդարտվի, երկու տարով։ Բայց արդեն այն ժամանակ որոշ ղեկավարներ ասում էին, որ դա ոչ թե երկու տարով է, այլ երկար ժամանակով։ Ինչպես տեսաք, ոչ վաղ անցյալում նրանց գտնվելու ժամկետը երկարաձգվեց։ Ճիշտ է, այսօր, այն բոլոր իրադարձություններից հետո, որոնք մենք տեսանք օվկիանոսի այն կողմում՝ ամուր ձեռքսեղմումներ, տարբեր փաստաթղթերի ստորագրումներ, մենք արդեն գիտենք, թե ինչի համար են այնտեղ եվրոպացի դիտորդները»,- ավելացրել է Շոյվում։