Ինչպես ասում են՝ «Дружба дружбой, а служба службой». Փաշինյանը՝ Պուտինի հետ հարաբերությունների մասին

Սահմանափակումները միշտ եղել են, եթե որևէ ստանդարտի չեն համապատասխանել, անդրադառնալով ՌԴ-ի կողմից Հայաստանից վարդերի արտահանման արգելքին, ասաց Նիկոլ Փաշինյանը։

Նա վստահեցրեց, որ նման իրավիճակներ վերջին տարիներին շատ են եղել և ոչ միայն վարդի հետ կապված. «Այդ մասին ԵԱՏՄ-ում մենք քննարկում ունեցել ենք, թե որոշ ապրանքներ, որոնք արտահանվում-ներկրվում են որպես ԵԱՏՄ ապրանք, ինչքանով են ԵԱՏՄ ապրանք։ Նման հարցերն անընդհատ են կրկնվում բոլոր երկրների հետ կապված»։

Փաշինյանը նաև անդրադարձավ ԵԱՏՄ-ում Հայաստանի կարգավիճակին. «ԵԱՏՄ-ում կարգավիճակի հարցը կառույցի կարգավորումներով կարող է քննարկել միայն Հայաստանը, ուրիշ պրոցեդուրա չկա։ Սակայն ցանկացած հարց կարող ենք քննարկել, ենթադրում եմ մեր գործընկերների մոտ հարցեր կարող են լինել, մենք համբերատար կպատասխանենք»։

Իսկ ինչ վերաբերում է Պուտինի հետ ընկերական հարաբերություններին, Փաշինյանը հումորով պատասխանեց. «Ինչպես ասում են՝ «Дружба дружбой, а служба службой», դա ինչ կապ ունի աշխատանքային հարցերի հետ։ Այսինքն՝ եթե հարաբերություններն ընկերական են, նշանակում է ստանդարտներին չհամապատասխանող ապրանքներն արտահանվեն ու ներուծվե՞ն»։