Այս անգամ փոփոխությունները կենսական անհրաժեշտություն են պետության ապագայի համար. Սուրենյանց

«Փոփոխությունները անհրաժեշտ են։ Եվ այդ փոփոխություններն անխուսափելի են։ Ուշադրություն դարձրեք՝ մենք խոսում ենք ոչ թե պարզապես իշխանափոխության, այլ իրական, խորքային փոփոխությունների մասին»,-գրում է Դեմոկրատական այլընտրանք կուսակցության առաջնորդ, ԲՀԿ ցուցակով պատգամավորի թեկնածու Սուրեն Սուրենյանցը։

«2018 թվականի իրադարձությունները դրա ամենախոսուն ապացույցն են։ Այն ժամանակ հարյուր հազարավոր մարդիկ փողոց դուրս եկան՝ հավատալով արդարության, համերաշխության, արժանապատիվ կյանքի և անվտանգ ապագայի գաղափարին։ Սակայն տարիների ընթացքում ակնհայտ դարձավ, որ միայն իշխանության փոփոխությունը դեռ չի նշանակում պետական մտածողության, կառավարման մշակույթի և հասարակության նկատմամբ վերաբերմունքի փոփոխություն։

Ինչպես ութ տարի առաջ, այնպես էլ այսօր, հայ ժողովուրդը կրկին փոփոխությունների պահանջ ունի։ Այս անգամ այդ փոփոխությունները կենսական անհրաժեշտություն են պետության ապագայի համար։

Հայաստանին անհրաժեշտ է՝

երաշխավորված խաղաղություն՝ շարունակական զիջումների, մշտական սպառնալիքների և անորոշության փոխարեն,

հանրային համերաշխություն՝ հասարակությունը պառակտելու, թշնամանքի և ատելության մթնոլորտի փոխարեն,

սոցիալական արդարություն՝ ցուցադրական անհավասարության և արտոնյալների իշխանության փոխարեն,

ուժեղ և արդյունավետ պետություն՝ կառավարման քաոսի, անկազմակերպության և պարտությունների հոգեբանության փոխարեն,

արժանապատիվ կյանք՝ աղքատության, հուսահատության և արտագաղթի փոխարեն։

Մեր ժողովրդին այսօր անհրաժեշտ են ոչ թե կարգախոսներ, պատրանք կարճաժամկետ քարոզչական հնարքներ, այլ պատասխանատու կառավարում, ազգային համախմբում և ապագայի հստակ տեսլական։ Իրական փոփոխությունները սկսվում են երբ հասարակությունը հրաժարվում է հարմարվել պարտություններին, անարդարությանը և իշխանության կեղծ երկընտրանքի պարտադրած տրամաբանությանը։ Երբ քաղաքացին կրկին հավատում է, որ Հայաստանը կարող է լինել անվտանգ, արդար և բարգավաճ պետություն»,-գրում է նա։