Արարատ Միրզոյան, դու ո՛չ թե Ադրբեջանի, այլ Հայաստանի արտգործնախարարն ես

«Ուզում եք ասել, որ Հայաստանից Ադրբեջանի նկատմամբ թշնամական հայտարարություններ չե՞ն հնչում, իհարկե, հնչում են, հնչում են տարբեր ուժերից, դա կառավարության ծրագիրը չի, նույն թշնամական հայտարարությունները կարող ենք լսել, ցավոք սրտի, նաև Ադրբեջանից»։

Պատասխանելով լրագրողների դիտարկմանը, թե Ադրբեջանի կողմից հնչում են սպառնալիքներ՝ այս հայտարարությունն է արել Հայաստանի արտաքին գործերի նախարարը՝ Արարատ Միրզոյանը։

Մեկ անգամ ևս հիշեցնենք և ընդգծենք, որ Արարատ Միրզոյանը  ո՛չ թե Ադրբեջանի, այլ Հայաստանի ԱԳ նախարարն է, բայց, չգիտես ինչու, որոշել է արդարացնել Ադրբեջանի կողմից հնչեցրած սպառնալիքները՝ ստանձնելով Ադրբեջանի «պաշտպանի» դերը։

Սա է իշխող կուսակցության բռնած ուղեգիծը՝ թշնամիներին գոհացնել, կյանքի կոչել նրանց առաջ տարած թեզերը, սիրաշահել թշնամուն և դրա դիմաց ոչինչ չստանալ։ 

Ինչ վերաբերում է իշխանությունների կողմից դրոշակ դարձած «խաղաղության» թեզին, ապա սա զուտ իմիտացիա է և խաբկանք, եթե ոչ ժամանակավոր հրադադար։

Փաշինյանական թիմը բացել է Օվերտոնի պատուհանն ու փորձում է համոզել, որ Ադրբեջանը ճիշտ էր, Հայաստանը սխալվեց Արցախի հարցում: 

Ու հիմա էլ, Հայաստանի Արտաքին գործերի նախարարը, փոխանակ պաշտպանելու հայկական կողմի շահերը, հանդես է գալիս Ադրբեջանի «պաշտպանի» տեսանկյունից՝ կարծես նույն հարթության վրա դնելով Հայաստանի և Ադրբեջանի հանդեպ ունեցած իր պարտավորությունները։

Նա հաշվի չի առնում նաև այն հանգամանքը, որ եթե Հայաստանից հնչող հայտարարությունները հասարակության շրջանից են, ապա Ադրբեջանը բարձր մակարդակով է հնչեցնում զավթողական հայտարարություններ։

Մասնավորապես, հաճախ է օգտագործվում «Արևմտյան Հայստան» եզրույթը, որը, ոչ այլ ինչ է, եթե ոչ հավակնություն՝ Հայաստանի Հանրապետության սուվերեն տարածքին։

Այս համատեքստում արդեն, առնվազն տարակուսելի են, ըստ էության, Հայաստանի արտաքին գործերը կարգավորող և երկրի թիվ մեկ դիվանագետ համարվող Արարատ Միրզոյանի պահվածքն ու հայտարարությունները, որով նա պաշտպանում ու արդարացնում է Ադրբեջանի ընչաքաղց նկրտումները։

Ու հարց է առաջանում՝ ինչի՞ համար է նա աշխատավարձ ստանում։

Արմինե Մկրտումյան