Անունը Աչաջուր է, բայց նույնիսկ խմելու ջրի մեծ խնդիր ունենք. Մարդիկ Ծառուկյանին ներկայացնում են խնդիրները (տեսանյութ)

ԲՀԿ առաջնորդ Գագիկ Ծառուկյանը նախընտրական քարոզարշավի շրջանակում այսօր հանդիպում է Տավուշի մարզի Աչաջուր համայնքի բնակիչների հետ։ Քաղաքացիները բողոքում են ապրանքների, հարկերի բարձրացումից։ Ծառուկյանն արձագանքում է՝ խնդիրների լուծման համար մշակած ծրագրեր կան, եկել է լսելու մարդկանց մտահոգությունները, պատասխանելու նրանց հուզող հարցերին։

«Աչաջուրը բազմաթիվ խնդիրներ ունի, ոռոգման ջուրը խնդիր է։ Անունը Աչաջուր է, բայց նույնիսկ խմելու ջրի մեծ խնդիր ունենք։

Բազմաթիվ են խնդիրները գյուղատնտեսության ոլորտում, եթե նախկինում աշնանացան ցորենը մինչև 250 հա էր, այ տարի կարող է ունենանք 1-2 հա, եթե գյուղնախարարություն չունենք, ինչի՞ մասին ենք մենք մտածում»,- ներկայացնում է համայնքի բնակիչը։ Ծառուկյանն այստեղ էլ կարևորում է նախարարության վերականգնումը, պետության աջակցությունը գյուղացիներին՝ մատչելի պարատանյութերի, որակյալ սերմացուի տրամադրում, ոռոգման ջրի ապահովում։

«480 հազար հա հող ունենք, այսօր 140 հազարն է մշակվում։ Այսօր գյուղացին բերք ու բարիք ստեղծող է, սահման պահող է, ժողովրդին կերակրողն է, նրան պետք է արտոնություն տան, դոտացիա տան, սահմանին ապրող մարդու հոսանքն էլ, գազն էլ անվճար պետք է լինի»,-ասաց Ծառուկյանը՝ այստեղ էլ հորդորելով անպայման գնալ ընտրության ու քվեն տալ արժանի թեկնածուին՝ նայելով ոչ թե խոսքին, այլ գործին։