ՀՀ–ում զինծառայության նոր կարգ կգործի ԼՂ–ից բռնի տեղահանված անձանց համար. փոխնախարար

ԼՂ–ից բռնի տեղահանված, 27 տարին լրացած անձինք այլևս խնդիր չեն ունենա ՀՀ քաղաքացիություն ստանալու հարցում, եթե տեղահանման հետևանքով կորցրել են կամ չեն վերցրել ծառայությունը փաստող փաստաթղթերը։ Այսօր Ազգային ժողովում այդ մասին հայտարարեց ՀՀ պաշտպանության նախարար Արման Սարգսյանը` ներկայացնելով «Զինվորական ծառայության, զինծառայողի կարգավիճակի մասին» ՀՀ օրենքում փոփոխություններ կատարելու մասին նախագիծը։

 

2024 թ. հունվարի 16–ին ԱԺ–ն ընդունեց օրենսդրական փոփոխություններ, ըստ որոնց` 27 տարին լրացած և ծառայություն չանցած անձինք, կարող են վերադառնալ Հայաստան, մուծել կոնկրետ գումար, այս կամ այն չափով ծառայել կամ չծառայել` արդյունքում ազատվելով քրեական պատասխանատվությունից։

Պաշտպանության փոխնախարարը նշեց, որ այս կարգավորումը որոշակի խնդիրներ էր ստեղծել ԼՂ–ից բռնի տեղահանված անձանց համար։

Նախագծով նոր կարգավորումներ են առաջարկվում նաև 2024 թ. հունվարի 16–ին ընդունված օրենսդրական փոփոխությունների արդյունքում կրճատ ժամկետում պարտադիր զինվորական ծառայություն անցնող 27–37 տարեկան զինծառայողների արձակուրդների համար։ Օրինակ` մեկ տարով կամ 6 ամսով ծառայություն անցնողների դեպքում սահմանվում է 10–օրյա արձակուրդ, մեկ ամսյա ծառայության դեպքում` արձակուրդ չի տրվի։

Ի դեպ, նոր կարգավորում կգործի նաև «Պաշտպան հայրենյաց» ծրագրով պայմանագրային ծառայության դեպքում։ Եթե պայմանագրային զինծառայողը մեկ տարվա ընթացքում 5 անգամ ստանա կարգապահական տույժ, նրա պայմանագիրը կդադարեցվի։