NEWSPRESS.am-ի հրապարակումներից հետո, ի վերջո, դատախազությունը փորձում է զբաղվել Փաշինյանի ընկեր Վահե Ղազարյանի օրինախախտումներով (տեսանյութ)

Տավուշի մարզի դատախազի տեղակալ Հ․ Աղասարյանը Դիլիջանի ավագանուն առաջարկություն է ներկայացրել` հայցով մտնել դատարան` Դիլիջանում ապօրինի օտարված հողամասի խնդրի հետ կապված: Խոսքը Դիլիջան քաղաքի Վասիլևի փողոց, 158 հողամաս հասցեի 0․13504 հա չկառուցապատված հողամասի մասին է: 

«Հրապարակ»-ը մանրամասներ է հայտնել,  թե՝ ինչ որոշմամբ և ինչպիսի անօրինական ճանապարհով է օտարվել հողատարածքը:

Հարկ ենք համարում հիշեցնել ընթերցողներին, որ այս խնդրին NEWSPRESS.am-ն անդրադարձել էր դեռ նախորդ տարվա՝ 2025 թվականի հուլիսին: Հրապարակման մեջ նշել էինք, որ, ըստ մեզ հասած տեղեկությունների,  ՆԳ նախկին նախարար Վահե Ղազարյանն ակտիվ շինարարություն է ծավալում. կապիտալ շինարարություն` ծառահատումներով։

Դատախազությանը դիմել էինք զբաղվել խնդրով: 

Բավականին ուշացած, բայց դատախազությունը, ի վերջո, առաջարկություն է ներկայացրել` հիշյալ գործի հայցով մտնել դատարան:

Պարզվում է, որ  պետական սեփականություն հանդիսացող այս հողամասում շինարարությունն սկսվել  է առանց պետական լիազոր մարմնի դրական եզրակացությունը ստանալու:

Այսինքն՝ աճուրդը հայտարարվել է 2022 թվականին, 2 ամսվա մեջ ձևակերպվել է հողատարածքի վաճառք և, առանց աճուրդը հաստատելու, սկսվել են շինարարական աշխատանքներ:

Հողատարածքի վաճառքը հաստատելու ամսաթվի մեջ նաև ուշագրավ մի հանգամանք կա:

Այսպես. վաճառքը հաստատվել է NEWSPRESS.am-ի կողմից կատարված նկարահանումներից հետո:

2025 թվականի հուլիս ամսին կատարվել են նկարահանումներ, որտեղ երևում են 2-3 փայտե քոթեջներ: Այն ժամանակ նշել էինք, որ շինարարություն իրականացնող կազմակերպության ներկայացուցիչները խուսափել են պատասխանել մեր հարցերին ու չէին ցանկացել տեսանկարահանվել:

Դատախազությանը դիմել էինք ոչ  միայն կայքում տեղադրված հրապարակմամբ, այլև նամակով և խնդրել ուսումնասիրություններ կատարել:

Մեր հրապարակումից 2 ամիս անց՝  06․09․2025 թվականին, հիշյալ հողամասի, դեռ 2022 թվականին կայացած աճուրդի արդյունքները հաստատվել են:

Այսպիսով, ՀՀ սեփականություն հանդիսացող հողամասը հանգստի նշանակության օբյեկտի կառուցման նպատակով, 9․452․800 դրամով օտարել է Հայկ Ռոբերտի Ղազարյանին։  

Հայկ Ղազարյանը Վահե Ղազարյանի եղբայրն է:

Մեր տեղեկություններով՝ իրականում այս տարածքը պատկանում է ոչ թե նրան, այլ հենց նախկին նախարարին:

Իհարկե լավ է, որ դատախազությունը փորձում է զբաղվել գործով, բայց ցանկալի կլիներ, եթե զբաղվեր ո՛չ թե գործով մեղավորներին սերտաճած անձերով, այլ համարձակություն ունենային անմիջապես դեմ դուրս գալ նախկին նախարարին, ում դեռևս հաջողվում է օգտագործել իր պաշտոնավարման ընթացքում ձեռք բերած լծակները:

Ինչպես նաև, շատ արդար կլիներ գնալ նաև Վահե Ղազարյանի անվան հետ առնչվող մեկ այլ՝ «3 անշարժ գույք` պաշտոնեական լիազորությունները չարաշահելու համար. ումից և ինչ «լավությունների» դիմաց է Վահե Ղազարյանը տներ նվեր ստացել» վերտառությամբ  հրապարակման հետքով: