Հայաստանը ծայրագավառ չի լինելու, Բելառուսի կառավարման օրինակը իմ երկրի համար, ինձ համար անընդունելի է. Ալեն Սիմոնյան

«Չեմ մեկնաբանում։ Բելառուսը Բելառուս է, Հայաստանը՝ Հայաստան։ Ես իմ երկրի պատասխանատուն եմ»,- ճեպազրույցի ժամանակ ասաց ԱԺ նախագահ Ալեն Սիմոնյանին՝ կապված Բելառուսի ԱԳՆ-ի մեկնաբանության հետ՝ ԱԺ նախագահի արած հայտարարության վերաբերյալ։

Հիշեցնենք՝ Ալեն Սիմոնյանը հայտարարել էր, որ «Հայաստանը չպետք է կառավարվի այնպես, ինչպես Բելառուսը»։ Այդ հայտարարարությունից հետո Բելառուսի արտաքին գործերի նախարարությունը բողոք էր հայտնել պաշտոնական Երևանին՝ «հայկական կողմի ոչ բարեկամական գործողությունների կապակցությամբ»։ Բելառուսական կողմը հայտարարել էր, որ ԱԺ նախագահ Ալեն Սիմոնյանի հայտարարությունները  Բելառուսի մասին նախընտրական պոպուլիզմ են և Հայաստանի ներքին խնդիրներից հասարակության ուշադրությունը շեղելու փորձ։

Լրագրողի հարցին՝ արդյո՞ք այդ հայտարարություններն ավելի չեն վատացնի երկու երկրների հարաբերությունները, Սիմոնյանը պատասխանեց. «Հայաստանի նկատմամբ, ՀԱՊԿ գործընկերոջ նկատմամբ, Հայաստանի պետականության նկատմամբ անհարգալից վերաբերմունքն է վատացնում հարաբերությունները, Ադրբեջանի հետ 44-օրյա պատերազմ նախապատրաստելն է վատացնում հարաբերությունները:

Շատ տարբեր բաներ են վատացնում հարաբերությունները, և քաղաքական կուրսն ամեն պետության ընտրության հարց է: Հայաստանի համար մարդու իրավունքները, ազատությունները կարևորագույն արժեքներ են, և, ես կարծում եմ, որ ամեն պետությունն իր օրինակն է ընտրում: Մենք ընտրել ենք Հայաստանի ժողովրդավարացման ճանապարհը, իրենք՝ մի քիչ այլ ճանապարհ, ոչ այնպիսին, ինչպիսին Հայաստանը»։

Սիմոնյանը նաև նշեց, որ Հայաստանը ծայրագավառ չի լինելու. «Հայաստանը քաղաքական կախվածության մեջ չի լինելու, Հայաստանը իր ինքնիշխանության մակարդակը բարձրացնելու է, և Բելառուսի կառավարման օրինակը իմ երկրի համար, ինձ համար անընդունելի է։ Հայաստանն ազատ երկիր է իր ազատ մեդիաներով, մարդու իրավունքներով, օրենքի գերակայությամբ»։