Կանգնած ենք վճռական ընտրության առջև. Հայր Գրիգոր

Հայ Առաքելական Սուրբ Եկեղեցին նշել է Սուրբ Խաչի Երևման տոնը։

Տոնի և Ապարանի Սուրբ Խաչ եկեղեցու վերաօծման 24-րդ տարեդարձի առթիվ, Ն․Ս․Օ․Տ․Տ․ Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի Հայրապետական տնօրինությամբ և Արագածոտնի թեմի առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ տարիներ ձևավորված բարի ավանդույթի համաձայն, Մայր Աթոռ Սուրբ Էջմիածնից Ապարանի Սուրբ Խաչ եկեղեցի էր բերվել մեր Տեր Հիսուս Քրիստոսի Խաչափայտի կենարար մասունքը։

Սուրբ մասունքը հանդիսավոր թափորով բերվել է եկեղեցի ու մատուցվել տոնական Սուրբ և Անմահ Պատարագ։

Օրվա Պատարագիչն էր Մայր Աթոռ Սուրբ Էջմիածնի միաբան, Ամենայն Հայոց Կաթողիկոսի հանձնակատար Հոգեշնորհ Տեր Գրիգոր աբեղա Մինասյանը։

Հայր Սուրբը ընթացս Պատարագի խոսված քարոզում իր որդիական երախտագիտությունն է հայտնել Արագածոտնի թեմի առաջնորդին և հոգևոր դասին ու անդրադարձել տոնի խորհրդին՝ նշելով․ «Իմ որդիական երախտագիտությունն եմ հայտնում Արագածոտնի թեմի բարեխնամ առաջնորդ Գերաշնորհ Տ. Մկրտիչ եպիսկոպոս Պռոշյանին, ում օրհնությամբ այսօր այս սուրբ տաճարում մատուցում եմ Սուրբ և Անմահ Պատարագ։ Սրբազան Հայրը մեզ՝ երիտասարդ հոգևորականներիս համար, մշտապես եղել է անձնուրաց հոգևորականի կերպար և ոգեշնչել է մեզ՝ հաղթահարելու դժվարությունները և անվրդով կերպով հասնելու «խաղաղ նավահանգստին»։

Դուք քաջատեղյակ եք, սիրելի՛ հավատացյալներ, թե ինչպիսի դժվարությունների միջով անցան Սրբազանն ու թեմի ողջ եկեղեցականաց դասը, բայց առավել ամրացավ նրանց կամքն իրենց ընտրած ճանապարհին՝ Տիրանվեր խոսքի համաձայն. «Եթե մեկը կամենում է հետևել ինձ, թող ուրանա իր անձը, վերցնի իր խաչը և գա իմ հետևից» (Մատթ. 16:24): Շնորհակալություն եմ հայտնում նաև թեմի վարչական խորհրդի ատենապետ Հոգեշնորհ Տ. Շնորհք աբեղա Պալոյանին, ինչպես նաև Ապարանի Սուրբ Խաչ եկեղեցու հոգևոր հովիվներին՝ մեր սիրելի ու արժանապատիվ հայրերին ովքեր խոնարհաբար այս նվիրական օրը իրենց տեղը զիջեցին ինձ։

Քսան և ավելի տարիներ առաջ, այս նույն տոնին, ազգիս շնորհազարդ Հայրապետի՝ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի շնորհաբաշխ աջով նվիրագործվեց այս սուրբ եկեղեցին՝ որպես ձեր՝ առ Աստված ունեցած անաղարտ հավատքի կենդանախոս վկայարան: Վստահ եմ, որ այդ օրը բոլորիդ համար դարձավ ձեր կյանքի անմոռանալի օրերից մեկը: Այսօր մեր հոգիները վերստին լուսավորվում են ու ջերմանում, որովհետև ազգընտիր Հայրապետի օրհնությամբ այս սրբավայր է բերվել մեր Տիրոջ՝ Հիսուս Քրիստոսի կենդանաբաշխ արյամբ սրբագործված Խաչափայտի մասունքը:

Սիրելի՛ հավատացյալներ, Սուրբ Խաչի Երևման տոնը ևս մեկ առիթ է բոլորիս համար՝ խորհելու մեր կյանքում Աստծո անթիվ պարգևների մասին և վերստին արժևորելու մեր հոգևոր կյանքի կարևորագույն զենքը: Եկե՛ք մեր հայացքն ուղղենք դեպի Խաչի փրկչական լույսը, որպեսզի այն փարատի մեր հոգու մեղքերի թանձր խավարը: Մենք կանգնած ենք վճռական ընտրության առջև. կա՛մ ընդունում ենք Քրիստոսի Խաչի փրկարար զորությունը և ժառանգում կյանքը, կա՛մ մնում ենք մեղքի ծառաներ ու կորստյան մատնվում: Փրկության կոչը միշտ բաց է. բավական է միայն կայացնել այդ մեծ որոշումը և ընդունել Աստծո սերը: Թող մեր կյանքի յուրաքանչյուր դրվագ սրբագործվի Խաչի նշանով՝ դառնալով մեր հավատքի և Աստծո անհատնում ողորմության յուրօրինակ մի վկայություն:

Աղոթե՛նք, որ Տերը մեզ զորացնի Իր Սուրբ Խաչի հովանու ներքո, մեզանից հեռացնի ամեն տեսակ երևելի ու աներևույթ թշնամիներին և առաջնորդի մեզ դեպի հավիտենական լույսի արքայություն»։

Սուրբ Պատարագին ներկա էին Ապարանի հովվության հոգևոր հովիվները, եկեղեցու այս տարվա Խաչքավորը, ուխտավոր հայորդիներ Հայաստանի տարբեր համայնքներից Ապարան եկած։

Խաչափայտի մասունքով կատարվել է բժշկության աղոթք և հավատացյալներն հնարավորություն են ունեցել հաղորդակից դառնալու Սուրբ մասունքի օրհնությանը։

Սուրբ Պատարագի ավարտին Սուրբ Խաչ եկեղեցու հոգևոր դասը և հավատացյալները, հանդիսավոր թափորով շրջել են քաղաքում և քաղաքի չորս կողմերից կատարել Անդաստանի արարողություն: