ԱՀԿ-ն ԱՄՆ-ից 260 միլիոն դոլարի պարտքը մարելու վերաբերյալ ազդակներ չի ստացել

Առողջապահության համաշխարհային կազմակերպությունը (ԱՀԿ) ԱՄՆ-ից ավելի քան 260 միլիոն դոլարի պարտքը մարելու պատրաստակամության մասին ազդակներ չի ստացել, առանց որի, ըստ կազմակերպության, ԱՀԿ-ից Վաշինգտոնի լիարժեք դուրս գալն անհնար է։ Դրա մասին հայտարարել է ԱՀԿ գլխավոր տնօրեն Թեդրոս Ադանոմ Գեբրեյեսուսը։

Ժնևում ճեպազրույցի ժամանակ նա նշել է. «Մենք հույս ունենք ստանալու միջոցները, սակայն առայժմ ազդակներ չենք ստացել»։ Միևնույն ժամանակ, Գեբրեյեսուսը չի բացառել, որ կազմակերպությունը կարող է չստանալ հասանելիք անդամավճարները։

Նա նաև ընդգծել է, որ ԱՀԿ ներքին վերակազմավորումից հետո ԱՄՆ հետ երկխոսության հիմնական կենտրոնացումն այլևս չի սահմանափակվում ֆինանսական հարցերով։ Ըստ նրա՝ ավելի կարևոր է տեղ հասցնել միտքը, որ կազմակերպությունից ԱՄՆ դուրս գալը կարող է ռիսկեր ստեղծել ինչպես հենց Միացյալ Նահանգների, այնպես էլ առողջապահության համաշխարհային համակարգի համար։ Գեբրեյեսուսը կոչ է արել ուժեղացնելու միջազգային համագործակցությունը և համերաշխությունը առողջապահության ոլորտում։

Ավելի վաղ ԱՄՆ-ը հայտարարել էր ԱՀԿ-ից դուրս գալու մասին, սակայն կազմակերպությունում նշել էին, որ անդամակցությունը չի կարող ավարտված համարվել նախքան բոլոր պարտքերի մարումը։ ԱՀԿ տվյալներով՝ խոսքը 2024–2025 թվականների համար շուրջ 260,6 միլիոն դոլարի անդամավճարների մասին է։

Հարցի վերաբերյալ վերջնական որոշումները սպասվում են Առողջապահության համաշխարհային ասամբլեայի նստաշրջանում, որը տեղի կունենա մայիսին՝ Ժնևում։