Երբ Աննա Հակոբյանը քրեական գործ է հարուցում Դանիել Իոանիսյանի դեմ, դրանով նա իրականում փաստարկ է տալիս Իոանիսյանին, ընտրական այս շրջանում այսպես ասած «ապացուցում» նրա՝ իշխանության հետ կապ չունենալը. վերլուծաբան

Նիկոլ Փաշինյանի հետ վերամիավորված Աննա Հակոբյանը հայտարարել է, որ դիմելու է այսպես ասած քաղաքացիական կառույցներից մեկի ղեկավար Դանիել Իոանիսյանի դեմ քրեական գործ հարուցելու համար, քանի որ նա խախտել է իր՝ Աննա Հակոբյանի իրավունքները: Այս մասին տելեգրամյան իր ալիքում գրել է քաղաքական վերլուծաբան Հակոբ Բադալյանը։

«Ներեցեք, բայց սա արդեն նույնիսկ ծիծաղելի էլ չէ: 

Բացատրեմ, թե ինչն է հարցը: Դանիել Իոանիսյանի նախաձեռնած կամ ղեկավար «Անկախ դիտորդ» մարմինը դիմել է վարչական դատարան, ասելով, որ Աննա Հակոբյանի ղեկավարած Իմ քայլը հիմնադրամը ասոցացվում է կառավարող Քաղաքացիական պայմանագրի հետ եւ ըստ այդմ կա խնդիր օրենքի հետ: Աննա Հակոբյանը ասում է, թե չկա Իմ քայլի բարեգործության ոչ մի փաստ: Մի կողմ թողնենք՝ կա՞, թե՞ չկա: Միայն արձանագրենք, որ, եթե Իմ քայլի գործունեությունը այսպես ասած բարեգործություն չէ, ապա ի՞նչ է՝ առեւտրային գործունեությու՞ն: 

Բայց, դառնանք Դանիել Իոանսյանի դեմ քրեական գործ հարուցելու դիմումին, որի մտադրության մասին ասում է Աննա Հակոբյանը:

Ի՞նչ է տալու այդ դիմումը: Տալու է «անտուրաժ», որ Դանիել Իոանիսյանը իրականում իսկապես անկախ դիտորդ է, ոչ թե իշխանության հետ ասոցացվող քաղաքացիական ներկայացուցիչ: Մինչդեռ կա հենց տարածված համոզում, որ Իոանիսյանը ֆորմալ առումով լինելով քաղաքացիական անկախ կառույցի ներկայացուցիչ, իրականում, դե ֆակտո՝ պաշտպանում է իշխանության քաղաքական շահերից բխող նարատիվներ: Ընդ որում, այդ գնահատականի փաստարկները համենայն դեպս քիչ չեն, որ կարող են ստեղծել այդպիսի տպավորություն:

Երբ Աննա Հակոբյանը քրեական գործ է հարուցում Դանիել Իոանիսյանի դեմ, դրանով նա իրականում փաստարկ է տալիս Իոանիսյանին, ընտրական այս շրջանում այսպես ասած «ապացուցում» նրա՝ իշխանության հետ կապ չունենալը, անկախ լինելը:

Կրկնեմ, ես չգիտեմ՝ Իոանիսյանը ինչ կապ ունի կամ չունի իշխանության հետ, բայց նրա գործունեությունը մի շարք ակնառու դրվագներ է պարունակում, որոնք առնվազն տվել են այդպիսի տպավորություն ունենալու հիմքեր հանրության տարբեր շերտերի: Եվ ահա, Աննա Հակոբյանի քայլը անշուշտ այդ տպավորության դեմ հակափաստարկ է տալիս Իոանիսյանին: Իսկ նախընտրական շրջանում, հաշվի առնելով նաեւ այն, որ Իոանիսյանն էլ՝ ինչպես կառավարող ուժը, լծված է «հիբրիդային գրոհների» դեմ պայքարի՝ որն իրականում այլ բան չէ, քան պայքար ընդդիմության դեմ, Աննա Հակոբյանի ընձեռած այդ հակափաստարկը շատ  է պետք»: