Գագիկ Ծառուկյանն Արևաշողում և Գարգառում. «Ժողովրդի վստահությունն ամենամեծ պատասխանատվությունն է»

«Բարգավաճ Հայաստան» կուսակցության առաջնորդ Գագիկ Ծառուկյանը շարունակել է ուղևորությունը Լոռու մարզում՝ այցելելով Արևաշող գյուղ, որտեղ նրա հանդիպումը սկսվել է հենց ճանապարհին. բնակիչները կանգնեցրել են ավտոշարասյունը և հրավիրել նրան աղ ու հաց կիսելու։

«Ես շատ շնորհակալ եմ ուշադրության, հրավերի համար, զգացված եմ։ Ամենակարևորը վստահությունն ու հարգանքն է։ Այսօր ոչ մեկին ոչնչով չես զարմացնի, բայց ջերմությունն ու հարգանքը զգացվում են։ Աստված ձեզ պահապան։ Ես միշտ ձեզ բարությամբ եմ հանդիպում»,- նշել է Ծառուկյանը։

Այնուհետև այցը շարունակվել է Գարգառ գյուղում։ Բնակիչներն ընդգծել են Ծառուկյանի ավանդը տարածաշրջանի զարգացման գործում. «Պարո՛ն Ծառուկյան, Դուք ժողովրդի հետ խոսում եք ոչ թե Ձեր գահից, այլ որպես հավասարը հավասարի։ Դուք շատ բան եք արել գյուղի համար»։

Գագիկ Ծառուկյանն ի պատասխան շեշտել է. «Ես այս հողի վրա ծնված մարդ եմ։ Կառուցել եմ դպրոցներ, մանկապարտեզներ, եկեղեցիներ, ստեղծել եմ աշխատատեղեր։ Բայց գլխավորն այն է, որ երիտասարդությունը չհեռանա, այլ ապագան տեսնի այստեղ»։

Նա նշել է, որ փոփոխությունները հնարավոր են միայն հասարակության մասնակցությամբ. «Եթե չմիավորվեք՝ ոչինչ չի փոխվի։ Սա ձեր երեխաների ապագայի հարցն է։ Պետք է մասնակցել, պետք է ակտիվ լինել»։

Հանդիպման առանձին թեմա է դարձել տաքսիստների վիճակն ու տուգանային միավորների (բալային) համակարգը, որը բնակիչներն անվանել են ամենացավոտ խնդիրներից մեկը։

Ըստ Ծառուկյանի, գործող մոտեցումն անարդար է. «Տաքսիստը, որն առավոտից երեկո ղեկին է, չի կարող հավասարեցվել այն մարդուն, որն օրական մեկ-երկու ժամ է մեքենա վարում։ Նրանք ունեն տարբեր ծանրաբեռնվածություն, տարբեր պատասխանատվություն և տարբեր իրականություն»։

Նա ընդգծել է, որ բալային համակարգը փաստացի զրկում է մարդկանց եկամտից. «Այսօր մարդն ազնիվ աշխատում է ընտանիք պահելու համար, բայց բալերի պատճառով նրան կարող են զրկել վարորդական իրավունքից։ Իսկ եթե նա զրկվում է իրավունքից՝ զրկվում է ապրուստի միջոցից։ Սա խնդրի լուծում չէ, սա հարված է ընտանիքին»։

Բնակիչները նաև հայտնել են, որ իրավիճակը զանգվածային բնույթ է կրում. «Այսօր հազարավոր վարորդներ մնում են առանց իրավունքի, նրանց մոտ կուտակվում են տուգանքներն ու սահմանափակումները։ Մարդիկ պարզապես չեն կարողանում շարունակել աշխատել»։

Ծառուկյանը նշել է մոտեցման վերանայման անհրաժեշտությունը. «Ես դեմ չեմ ճանապարհներին կարգուկանոն լինելուն։ Բայց կարգուկանոնը պետք է հաշվի առնի իրականությունը։ Չի կարելի նույն ձևով պատժել պրոֆեսիոնալ վարորդին և պատահական իրավախախտին»։

Նա հավելել է, որ համակարգը պետք է լինի ճկուն. «Եթե մարդը տարվա մեջ մի քանի սխալ է թույլ տվել՝ դա մի հարց է։ Բայց եթե մարդն ամեն օր ղեկին է և այդ չարչարանքով ընտանիք է կերակրում՝ նրա նկատմամբ պետք է այլ մոտեցում լինի»։

Կուսակցության առաջնորդի կարծիքով, խնդիրը դուրս է գալիս առանձին խախտումների շրջանակից. «Այսօր խոսքը տասնյակ հազարավոր մարդկանց մասին է, որոնք ռիսկի են դիմում մնալ առանց եկամտի։ Սա արդեն սոցիալական հարց է, այլ ոչ թե պարզապես վարչական»։