Ցինիզմ և ծաղր. միջին թոշակը ոչ թե գերազանցում, այլ 33000 դրամով պակաս է սպառողական զամբյուղից. կամ, դատարկ գրպանով, թոշակառուն Լառնակա գնա, որ ի՞նչ անի

Իր նախընտրական խոստումների ծրագիրը ներկայացնելիս՝ Նիկոլ Փաշինյանը հայտարարել է, թե՝ միջին կենսաթոշակը գերազանցում է սպառողական զամբյուղը: Սա ոչ թե պարզապես ճշմարտություն չէ, այլ ծաղր է՝ տարիքն առած կենսաթոշակառուի նկատմամբ:

Իբր քիչ էր, որ հայտարարում էին, թե  հետվճարը թոշակների բարձրացում է, այժմ էլ հերթական պրիմիտիվ մանիպուլյացիան է տեղի ունենում:

Դեռ 2024 թվականին, նվազագույն սպառողական զամբյուղի արժեքը 75000 դամ էր: 2025-ին՝ մոտ 82000: Այսինքն՝ գնաճի հետևանքով, մոտ  7000 դրամով թանկացել է մեկ անձի նվազագույն ծախսը:

2026-ի առաջին եռամսյակի տվյալնեորով՝ գնաճն ավելացել է: Բայց եթե անգամ, չավելանար, ու նվազագույն սպառողական զամբյուղի արժեքը համարենք 82000 դրամը, ապա պետք է նշել, որ միջին թոշակը՝ 49000 դրամ է:

Այսինքն՝  մաթեմաթիկոս պետք չէ լինել հաշվելու և հասկանալու համար, որ միջին թոշակը ոչ թե գերազանցում է նվազագույն սպառողական զամբյուղը, ինչպես դա փորձում է համոզել Փաշինյանը, այլ, դեռ մի բան էլ, 33000 դրամով պակաս է սպառողական զամբյուղից:

Եթե  անգամ հաշվի առնենք վերջին մեկ ամսվա թոշակների ավելացումը, ապա նույնիսկ այս դեպքում էլ միջին թոշակը չի գերազանցում սպառողական զամբյուղը, քանի որ գնաճը շարունակվում է. առաջին անհրաժեշտության ապրանքների գները բավականին ինտենսիվ աճում են։

Այնպես որ, կենսաթոշակառուների փողերը հաշվելիս, լավ կլիներ, Փաշինյանը չկտրվեր իրականությունից ու ոչ միայն վերանայեր նվազագույն սպառողական զամբյուղի արժեքը, այլև թարմացներ իր հիշողությունը, թե ինչ  խոստումներ է տվել թոշակառուներին ու ինչքան պետք է բարձրացներ նրանց թոշակները:

Այն ինչ անում է Փաշինյանը, դիտարկվում է որպես պրիմիտիվ, հերթական պոպուլիզմ, որով նա փորձում է փակել իր չկատարած խոստումների և իր թիմի ուռճացված աշխատավարձերի ու պարգևավճարների թեման:

Ինչ վերաբերվում է Փաշինյանի վկայակոչած Լառնակայի 900 դրամանոց տոմսին, ապա, եթե վիզաների քաշքշուկների պարագայում անգամ տոմս գնելը հնարավոր է, ապա հարց է առաջանում՝ թոշակառուն գնա Լառնակա՝ որ իր 50 000 դրամ միջին թոշակով ի՞նչ անի: 

Լառնակայում օդո՞վ են սնվում ու ապրում... 

Ու մինչ Փաշինյանը, իր ցինիկ ոճով շարունակում է ծաղրել տարեց ու, շատ դեպքերում նաև, անօգնական մարդկանց,  թոշակառուներն իրենց դատարկ գրպանի պարունակության մեջ են զգում ու տեսնում իրական պատկերը:

Արմինե Մկրտումյան