Հանրային քննարկման է դրվել որդեգրման նոր կարգի նախագիծը․ ի՞նչ է առաջարկվում փոխել

e-draft հարթակում հանրային քննարկման է ներկայացվել «Որդեգրման և որդեգրման վերահսկողության իրականացման կարգերը հաստատելու մասին» կառավարության որոշման նախագիծը, որը նպատակ ունի արմատապես վերանայել ոլորտի գործող կարգավորումները։

Նախագիծը մշակվել է Աշխատանքի և սոցիալական հարցերի նախարարության կողմից՝ միջազգային գործընկերների աջակցությամբ, և քննարկման ժամկետ է սահմանվել ապրիլի 20-ից մինչև մայիսի 6-ը։

Ներկայումս որդեգրման գործընթացը կարգավորվում է տարբեր իրավական ակտերով՝ ընտանեկան օրենսգիրք, քաղաքացիական դատավարության օրենսգիրք, մի շարք օրենքներ և կառավարության որոշումներ, ինչը հաճախ բարդացնում է գործընթացը թե՛ իրավակիրառողների, թե՛ որդեգրել ցանկացող քաղաքացիների համար։

Նոր նախագծով առաջարկվում է ունենալ մեկ միասնական իրավական ակտ, որը կկարգավորի որդեգրման և դրա վերահսկողության գրեթե բոլոր փուլերը։ Ըստ հեղինակների՝ սա թույլ կտա համակարգել գործընթացը և այն համապատասխանեցնել միջազգային չափորոշիչներին։

Առանձնահատուկ կարևոր փոփոխություններից մեկը վերաբերում է «համադրման» մեխանիզմին։ ArmLur.am-ը պարզեց, որ նախագծով որդեգրումը այլևս չի հիմնվելու միայն որդեգրել ցանկացող անձի ընտրության վրա։ Փոխարենը ներդրվում է երկփուլ համակարգ՝

տեխնիկական փուլ,
մասնագիտական փուլ։

Այս մեխանիզմով երեխայի և որդեգրողի համապատասխանությունը գնահատվելու է տարբեր չափանիշներով՝ երեխայի կարիքներ, ընտանիքի պայմաններ, հոգեբանական միջավայր և այլ գործոններ։ Նպատակն է ապահովել երեխայի լավագույն շահը և բացառել «ընտրության» սուբյեկտիվ մոտեցումները։

Նախագծով նաև առաջարկվում է ստեղծել միասնական շտեմարան որդեգրման ենթակա երեխաների և որդեգրել ցանկացող անձանց վերաբերյալ, սահմանել հստակ կանոններ գործընթացի գաղտնիության համար, ինչպես նաև հստակեցնել վերահսկողության մեխանիզմները։