Մահացել է ռեժիսոր-պրոդյուսեր Սուրեն Թադևոսյանը. հոգեհանգիստը տեղի կունենա Երևանում

Երեկ գիշերը Վալենսիա քաղաքի հիվանդանոցներից մեկում երկարատև հիվանդությունից հետո մահեցել է հայտնի ռեժիսոր-պրոդյուսեր Սուրեն Թադևոսյանը: Այս մասին հայտնել է նրա եղբայրը` Դավիթ Թադևոսյանը:

Ռեժիսորը հուլիսի 19-ին կդառնար 41 տարեկան:

Սուրեն Թադևոսյանը  հեղինակել է 16 հեռուստանախագիծ, 2 հեռուստասերիալ: 2004-05թթ եղել է «Դար 21» հեռուստաընկերության գլխավոր ռեժիսորը, 2007-11թթ` «TV 5»-ի գլխավոր պրոդյուսերը եւ փոխտնօրենը: Եղել է «Արմատ» երաժշտական նախագծի եւ երգիչ Նարեկ Բավեյանի պրոդյուսերը: Նկարահանել է ավելի քան 80 երաժշտական, 100 գովազդային տեսահոլովակ: ԱՄՆ-ի «Գոլդեն Սթար» երաժշտական մրցանակաբաշխության ժամանակ Արսեն Սաֆարյանի «Հուշերի քաղաք» տեսահոլովակի համար արժանացել է «Տարվա լավագույն տեսահոլովակ» մրցանակին, իսկ 2010թ.` «Տարվա լավագույն ռեժիսոր»: 2011թ. Իսպանիայի Բիլբաո քաղաքի կինոփառատոնի ժամանակ արժանացել է «Լավագույն կարճամետրաժ ֆիլմի սցենար» մրցանակին:
Newspress.am-ը ցավակցում է Սուրեն Թադևոսյանի հարազատներին և ընկերներին և հայտնում, որ Սուրենի հոգեհանգիստը տեղի կունենա Երևանում: