Զոհվածի ծնողը պահանջում է մաքրել իր որդու նկարը ջերմատան քանդվող պատից. քաղաքապետարանից խոստացել են լուծում տալ խնդրին

44-օրյա պատերազմի մասնակից, հերոսաբար նահատակված Արարատ Արմենի Մանյանի մայրը՝ Վարդուհի Շահումյանն ահազանգում է՝ առանց իր իմացության և թույլտվության Երևանի Չարենցի անվան թիվ 67 դպրոցին հարակից գործող ջերմատան պատին իր զոհված որդու պատկերն են նկարել: Այժմ նա պահանջում է մաքրել որդու նկարը պատից:

NEWSPRESS.am-ի հետ զրույցում Վարդուհի Շահումյանը նշեց, որ պատի վրա որդու նկարի գոյության մասին պատահական է իմացել՝ ծանոթներից: Նա չի ուզում, որ իր որդու նկարը լինի ջերմատան կիսաքանդ պատին:

Ովքեր են նկարել որդուն՝ չգիտի, բայց խնդրով դիմել է և՛ դպրոցի տնօրինությանը, և՛ Երևանի քաղաքապետարանին, որպեսզի մաքրեն նկարը: 

Դպրոցի տնօրենն ասել է, որ տեղյակ չեն, թե ով է արել, բայց կփորձեն մի բան մտածել: Կնոջը նույնատիպ պատասխան տվել են նաև քաղաքապետարանից:

Բայց մայրը մտահոգություն ունի, որ իրեն ականջալուր չեն լինի, և նկարը կմնա այդպես: Նա որոշել է դիմել մեր խմբագրություն:

NEWSPRESS.am-ը կապ հաստատեց, Երևանի քաղաքապետարանի լրատվության վարչության հետ, որտեղից մեզ տեղեկացրին, որ խնդրին արդեն ծանոթ են. թեև նկարը քաղաքապետարանի նախաձեռնությունը չէ, բայց մտածում են, թե ինչպես լուծում տալ հարցին ու ընդառաջել զոհվածի մորը:

Բանն այն է, որ Արարատ Մանյանի կողքին ևս երկու հերոսի նկար կա: Ու քանի որ նրանց ծնողները նկարները մաքրելու հարցով իրենց չեն դիմել, ուստի մտավախություն կա, որ Արարատ Մանյանի նկարը մաքրելիս՝ կվնասվեն մյուս երկուսը:

Ամեն դեպքում, քաղաքապետարանից վստահեցրեցին, որ անպայման մաքրելու լուծում գտնեն:

NEWSPRESS.am-ը հետևողական կլինի նկարի մաքրման գործընթացին: Սակայն մինչ այդ հարկ ենք համարում նշել, որ Արարատ Մանյանի մայրը՝ տիկին Վարդուին, որպես զոհվածի ծնող, պահանջում է, որ այլևս առանց իր իմացության և թույլտվության, ոչ մի պարագայում և ոչ մի տեղ չհայտնվի իր որդու նկարը:

Հիշեցնենք, որ Արարատ Արմենի Մանյանը ծնվել է փետրվարի 1-ին Երևանում։ Սովորել է Աբովյան քաղաքի Հայաստանի «ԴՕՍԱԱՖ» Համահայկական Հայրենասիրական Հասարակական կազմակերպությունում, որտեղ էլ ստացել է թրթուրավոր քարշիչի մեխանիկ-վարորդի վարման վկայական։