Էն մարդիկ, ովքեր չեն վճարում, ասում են՝ տեղ չկա ավտոբուսում՝ որպես բեռ մեր վզին տանում ենք․ էդ գումարով 2 ավտոբուս կարող էինք գնել․ Ավինյան (տեսանյութ)

«Նախորդ շաբաթվա միջինացված տվյալներով Երևան քաղաքում հանրային տրանսպորտից օգտվողների վալիդացիաների քանակը, համեմատած նախորդ շաբաթվա տարբեր օրերի հետ, ավելացել է 15-30%-ով»,-քաղաքապետարանի գործակարգավարական խորհրդակցության ժամանակ ասաց քաղաքապետ Տիգրան Ավինյանը։

Նա բացատրեց, որ նախորդ գործակարգավարականի ժամանակ հանձնարարել էր ավտոբուսի վարորդներին ներգրավել ուղեվարձի գանձման գործընթացում։

«Ուզում եմ իմ հիացմունքը հայտնել մեր վարորդների զսպվածությամբ և վարորդներով, ում աշխատանքային պայմանագրային պարտականությունն է նաև հետևել, որպեսզի վալիդացիան իրականացվի։ Իրապես տպավորիչ է և, իրականում, որքան էլ տարբեր անձինք փորձում են վարորդներին հունից հանել, նրանք հիմնականում մնում են անվրդով»,- ասաց Ավինյանը և շնորհակալություն հայտնեց նրանց՝ վերահսկողական ֆունկցիան կատարելու համար։

Հայտնելով, որ գրանցվել են մի քանի միջադեպեր՝ քաղաքապետը նշեց. «Մեկ կոնկրետ միջադեպ, որը վերածվել է կռվի և հարձակում է եղել վարորդի վրա։ Գիտեմ, որ երեք անձինք ձերբակալվել են և, ոնց որ չորրորդն էլ է անցնում համապատասխան գործով։ Ես ուզում եմ վստահ լինել, որ այդ անձինք պատժվելու են խստագույնս և իրականում որևէ ոտնձգություն վարորդների նկատմամբ, այն միայն անհատ անձի նկատմամբ ոտնձգություն չէ, այն ոտնձգություն է քաղաքի նկատմամբ, ոտնձգություն է ամբողջ համակարգի նկատմամբ։ Դիմում եմ բոլորին և վարորդներին, իրենց հետ ենք, իրենց կողքի կանգնած ենք, իսկ բոլոր այն չվճարող մարդիկ ամոթից աչքերը կախելու փոխարեն, դեռ մի հատ էլ ելույթներ են ունենում, դեռ մի հատ էլ հորդուբորդ են գալիս, դեռ մի հատ էլ ագրեսիվ են և մենք ենք մեղավոր՝ մենք բոլորս, նաև բոլոր պարտաճանաչ քաղաքացիները»։

Քաղաքապետը հայտարարեց, որ այդպիսի տարի չի եղել, որ շարժակազմերը չավելացնեն։

«Էն մարդիկ, ովքեր չեն վճարում, որպես բեռ մեր վզին տանում ենք, էն մարդիկ, ովքեր չեն վճարում, ասում են՝ տեղ չկա ավտոբուսում»,-հայտնեց Ավինյանը և եզրակացնելով, որ շափաթական 70-80 մլն դրամի չվճարելու դեպքում, այդ չվճարածով շաբաթական երկու ավտոբուս կարող էին գնել, հավելեց. «Իրենք բողոքում են նրանից, որ իրենց անպարտաճանաչության պատճառով մենք ավտոբուս չենք գնում»։

Նա հանձնարարեց շարունակել վերահսկողական աշխատանքները։