Սա միլիոններ պետք է բերի, մտածե՛ք, մի լուծում գտնենք, շատ եմ խնդրում. Փաշինյանը բջնեցիներին առաջարկեց ծախել տները՝ «Բջնի ամրոցի» տարածքին նվիրելու և այն գերակա շահ ճանաչելու համար

«Բջնի ամրոց» այցելության ժամանակ Նիկոլ Փաշինյանն ամրոցի տարածքի բնակիչներին առաջարկեց գնել նրանց տները «լավ գնով», որպեսզի տարածքը գերակա շահ ճանաչվի, և ամրոցին տրվի զբոսաշրջային նշանակություն:

Դիմելով պատասխանատու պաշտոնյաներին՝ Փաշինյանն ասաց, որ նախկինում ամրոցի մասով առաջադրված խնդիրները չեն լուծվել ամբողջությամբ, տարածքում դեռ կան ծառեր, որոնք խանգարում են ամրոցի տեսքին, նաև կան երևացող խողովակաշարեր:

«Սա հուշարձանի տեսք չէ, հարգելի՛ գործընկերներ: Եթե այստեղ նորմալ պեղումներ արվեն, այնքան բան կգտնեն: Նման հուշարձան մենք չունենք: Սա վերաբերմունք չէ, հարգելի՛ գործընկերներ»,- դժգոհեց Փաշինյանը:

Խոսքն ուղղելով ամրոցի տարածքի բնակիչներին, որոնք ներկա էին, խնդրեց որոշակի պայմանավորվածություն ձեռք բերել, համաձայնության գալ, մի լուծում գտնել ամրոցի տարածքը գերակա շահ ճանաչելու վերաբերյալ, քանի որ հուշարձանը եզակի է: 

Բնակիչներից մեկն ասաց, որ ամբողջ կյանքում տեր է կանգնել հուշարձանին, ճանապարհ է սարքել զբոսաշրջիկների համար: Փաշինյանը շնորհակալություն հայտնեց՝ միաժամանակ նշելով, որ գերակա շահ ճանաչելու դեպքում որոշ շենքեր էլ կապամոնտաժեն, քանի որ քաղաքաշինությունը պետք է ամբողջությամբ կառուցվի ամրոցի շուրջ:

«Սա միլիոններ պետք է բերի համայնքին: Բոլորի՛ն: Սա համայնքի բարեկեցության և հարստության արգասիքն է: Խնդրում եմ՝ մտածե՛ք, մի լուծում եկեք գտնենք, շատ եմ խնդրում»,-ասաց Փաշինյանը։