Մենք բուշլատով հաղթեցինք, դուք մեզ կոստյումով չդավաճանեք

Մենք բուշլատով հաղթեցինք, դուք մեզ կոստյումով չդավաճանեք:

Ցավոք կոստյումավորներն այսօր իրենց խոսքերով ու նաև որոշ արարքներով ստրկամիտ դավաՃանից ոչնչով չեն տարբերվում:

Համացանցում կարդում եմ, թե ինչպես Արմավիրի առաջին ատյանի դատարանը Ղևոնդ Պապոյանի թեթև ձեռքով, ապօրինի դատավճիռ է կայացրել. և դեռ ավելին` դատական վերջնագիր ուղարկել՝ գրոշների արժողությամբ խարխուլ տունը լքելու այն քաղաքացուն, ով 90-ականների պատերազմի բովով անցած` տուն է կորցրել. և դեռ ավելին՝ երկու տղաներից մեկն այսօր Ջեբրաիլի առաջնագծում է, իսկ մյուսը՝ Մատաղիսի դիրքերում:

Մենք բուշլատով հաղթեցինք, դուք մեզ կոստյումով չդավաճանեք:

Սա այսօր ուղղված է ԴԱՀԿ-ն ղեկավարող միլիոնատեր գեներալ Միհրան Պողոսյանին, ու նրա ենթակա ստորաբաժանումներին, որոնց աշխատողներն իրենց ձեռքը մտցրել են առաջնագիծը պահող հերոս զինվորի խարխուլ տունը: Հերիք է բռնագրավեք երեկ և այսօր այս հողը արյան գնով պահողների ունեցածն ու չունեցածը: Ձեր ու ձեր տղերքի տեղը հիմա սահմանն է, բռնագրավելուց էլ լավ եք, մի քանի բան հաջողացրեք թուրքից բռնագրավեք:

Մենք բուշլատով հաղթեցինք, դուք մեզ կոստյումով չդավաճանեք:

Այն, որ Հայաստանի կոստյումավորները այս 20 տարիների ընթացքում մեզ դավաճանել ու խաբել են, պարզ դարձավ ապրիլի մեկից մինչ օրս իրար հաջորդած իրադարձություններով: Այս տարիներին, երբ ազգի տղամարդկային մեծ ներուժը 94-ի հաղթանակը կերտելուց հետո այստեղ էր թողել իր երեխաներին ու ընտանիքներին և մեկնել արտագնա աշխատանքի մի կտոր հացի համար` մի պարզ գիտակցում էր ունեցել. ընտանիքի հոգսը չթողնենք պետության վրա, որ կոստյումավորները այստեղ ներսում տնտեսություն զարգացնեն և այսօրվա 18 տարեկանի ոգով ամրացված բանակը ժամանակակից տեխնոլոգիաներով ամրացնեն: Բայց կոստյումավորները պարզվում է ոչ մեկն են արել ու ոչ էլ մյուսը: Եվ արտագրնա աշխատանքից վերադարձած հայրերը այսօր գալիս են իրենց մարտիրրոսված զավակներին հողին հանձնելու:

Մենք բուշլատով հաղթեցինք, դուք մեզ կոստյումով չդավաճանեք:

Տնտեսագիտական հաշվարկներով այս 10-ը տարիների ընթացքում Հայաստանից անօրինական 9,5 միլիարդ դոլլար է դուրս եկել, ոըր կարող էր նպատակին ծառայելու դեպքում Հայաստանին սեփական ոտքեր ունեցող տնտեսություն տալ: Բայց քանի որ այս կոստյումավորները տառապում են ստրկամտությամբ և սիրում են միայն իրենց սեփական փողն ու փորը` մենք ունենք այն, ինչ ունենք. տանջված բայց հրաշք ժողովուրդ, որը վտանգի պահին ինքնակազմակերպվել գիտի ու սահմանը պահող իր զավակի կողքին կանգնել գիտի:

Մենք բուշլատով հաղթեցինք, դուք մեզ կոստյումով չդավաճանեք:

Սա այսօր ասվում է, վաղը պահանջ է դառնալու` պարոնա’յք կոստյումավորներ: