Կանսերվի բանկեքով պաշտպանվող սահմանագոտին ու պապաների փողերով` ֆեյսբուքյան էջով բաքուն գրավողները

Խիստ մասնավոր տեսակետ գիտության ու անգիտության հետևանքների մասին. Մտահոգություն օրվա խոհերով

Ես չգիտեմ ու չեմ էլ ուզում իմանալ, թե վերջին 25 տարում գիտական թեզի, գիտության անխոնջ «մշակի» պատրվակով քանի հոգի է  գրանցվել ԲՈՀ-ի գրանցամատյաններում ու թռել պարտադիր ժամկետային զինծառայությունից:

Չի եղել էդպիսի բան:

Ես չգիտեմ ու չեմ էլ ուզում իմանալ, թե մեր գիտության շտեմարանի էդ «դեբիտորական պարտքից» մեր գիտությունը, մեր կրթությունն ու հատկապես տնտեսությունը քանի՞ գրոշի օգուտ են շահել…

Չի եղել էդպիսի բան:

Ես գիտեմ ու շատ հստակ. ԲՈՀ-ի գրանցամատյանում պետք է պահել առավելագույնը մի քանի էջ, իսկ մնացածին գործուղել կանսերվի բանկեքով պաշտպանվող սահմանագոտի, որ իրենց կաշվի վրա զգան, թե իրենց պապաների փողերով ու իրենց ախմախ գիտական «թեզերով» ոնց են անիծել էս գիտության հերն էլ, մեր տնտեսության հերն էլ ու ամենաաններելին՝ մեր երկրի անվտանգությունը: Չնայած թողնես՝ «Ֆեյսբուքով» բաքուն էլ կգրավեն, մի բան էլ ավելի…

Կա այդպիսի բան:

Եվ ժամանակն է, որ իրավական հարթությունում հստակ ուսումնասիրության նյութ դառնա ասպիրանտա-բոհ-ա-գիտական այս խեղկատակությունը և ընդհանրապես գիտության անխոնջ մշակ դառնալու հիմքով բանակից թռնելու էս ինստիտուտի հետագա գոյության նպատակահարմարության հարցը:

Քանի դեռ իմ գիտությունը ունակ չէ գիտական պոտենցիալ ապահովել իմ երկրի սահմանների անվտանգությունն ապահովելու համար, նշանակում է, որ այդ կիսատ-պռատ գիտնականների վրա բյուջեից ծախսված ամեն լումա ոչ այլ ինչ է, քան պետական միջոցների՝ լումա առ լումա փոխհատուցման ենթակա փոշիացում:

Առաջարկում եմ ամբողջ գումարն ուղղել կանսերվի բանկեքը ժամանակակից պաշտպանական համակարգերով համալրելու համար անհրաժեշտ հաշվեհամարին:

Հիմա փորձեք ինքներդ հաշվել, թե այս 25 տարում որքան է կազմել այդ թիվը: Եթե դժվարանաք, երևի ԲՈՀ-ը կօգնի: