«Կանազ»-ի հրդեհի գործով կասկածյալներից 2-ը քոլեջի ուսանող են, 1-ը՝ դպրոցական. մտել են ներս` կիթառ նվագելու

Ազատության պողոտայում գտնվող «Կանազ» մշակույթի տան հրդեհի գործով կասկածյալներից 2-ը Երևանում գործող հայտնի քոլեջներից մեկի ուսանողներ են, 1-ը՝ Արաբկիր վարչական շրջանում գործող դպրոցներից մեկի աշակերտ։ Տեղեկությունը հայտնում է shamshyan.com–ը։

ՆԳՆ–ն ավելի վաղ տեղեկացրել էր, որ հրդեհի գործով 3 կասկածյալ կա, բոլորը անչափահասներ են։

«Կասկածյալներն են 14-ամյա Բ. Ն.-ն, 15-ամյա Ե. Ն.-ն և 16-ամյա Վ. Ղ.-ն։ Նրանք ծնողների ներկայությամբ խոստովանել են, որ իրենք միտումնավոր չեն հրկիզել, պարզապես մտել են ներս` կիթառ նվագելու։ Երբ մրսել են, կրակ են վառել, որպեսզի տաքանան, ինչից հետո կրակը մեծ արագությամբ տարածվել է, ու շենքը բռնկվել է»,– գրում է shamshyan.com–ը։

Հիշեցնենք` մարտի 25–ին` ժամը 19։10–ի սահմաններում, «Կանազ» մշակույթի տան շենքում հրդեհ էր բռնկվել, դեպքի վայր էր մեկնել 12 մարտական հաշվարկ, հարակից շենքերի բնակիչները տարհանվել էին։

Հայտնել էինք նաև, որ «Կանազ»-ի շենքի հրդեհի գործում կասկածվում են անչափահասներ. կիթառ են նվագել և, տաքանալու համար, շենքի ներսում գույք այրել: