Իսրայել Կացն սպառնացել է Սիրիային հարվածել, եթե դրուզները հետապնդվեն

Իսրայելի պաշտպանության նախարար Իսրայել Կացը սպառնացել է Սիրիայի դեմ ուժեղ հարվածներ հասցնել, եթե շարունակվեն երկրի հարավում գտնվող Սուվեյդա շրջանում դրուզ բնակչության նկատմամբ հարձակումներն ու հետապնդումները։

Ուրբաթ օրը ավելի վաղ Իսրայելի պաշտպանության ուժերը հայտնել էին, որ գիշերը հարձակվել են Սիրիայի հարավում գտնվող կառավարական և ռազմական ենթակառուցվածքների վրա։ Զինվորականները պնդում էին, որ հարվածները պատասխան են Սիրիայում կառավարամետ ուժերի կողմից դրուզ բնակչության վրա վերջերս իրականացված հարձակումներին։

«Մենք թույլ չենք տա, որ Սիրիայի կառավարությունը շահագործի մեր պատերազմը Իրանի և «Հեզբոլլահի» դեմ՝ դրուզներին վնասելու համար։ Անհրաժեշտության դեպքում մենք կհարվածենք ավելի մեծ ուժով։ Վարչապետ Բենիամին Նեթանյահուն և ես հրահանգել ենք բանակին թիրախավորել սիրիական կառավարությանը պատկանող ենթակառուցվածքները ալ-Սուվեյդա տարածքում՝ որպես Սիրիայի հարավում դրուզ բնակչությանը պատճառված վնասի ուղղակի պատասխան», - ասել է նախարարը, որի խոսքը մեջբերված է  Պաշտպանության նախարարության մամուլի ծառայության հաղորդագրությունում։