Ալիևը ոչ թե պատերազմ էր ուզում, այլ հաղթանակի իմիտացիա. քաղաքագետ

Ալիևը պարզապես լոկալ խնդիր էր ցանկանում լուծել. սեփական հանրությանը շեղել երկրի ներքին տնտեսական և սոցիալական խնդիրներից:

Այս մասին newspress.am-ի հետ զրույցում ասաց քաղաքագետ Երվանդ Բոզոյանը` պատասխանելով հարցին, թե ինչով էր պայմանավորված Ադրբեջանի կողմից սանձազերծած պատերազմը:

Նրա դիտարկմամբ`  սահմանային լարումները արձանագրվել են հատկապես վերջին երկու տարիներին, երբ նավթի գինն սկսեց էժանանալ և Ադրբեջանը կանգնեց տնտեսական խնդիրների առջև:

Ալիևն իշխանության միջոցով է բիզնես անում. իշխանությունը պահելու համար փորձեց սանձազերծել պատերազմը և հաղթանակներ գրանցելով հանրությանը շեղել այդ ուղղությամբ, սակայն դա նրան չհաջողվեց:

Ե. Բոզոյանը նաև շեշտեց, որ Ալիևը այս քայլով փորձեց կոնսոլիդացներ հասարակությանը, սակայն ինչպես երևում է այդ քարոզչությունը ևս չհաջողվեց:
Քաղաագետը հիշեցրեց, որ վերջին մեկ ամսվա ընթացքում, երբ Արևմուտքը պատրաստվում էր քննարկել մարդու իրավունքների պաշտպանության խնդիրը Ադրբեջանում, Ալիևը ԱՄՆ նախագահի հետ հանդիպումից մեկ շաբաթ առաջ, Արևմուտքի ճնշման տակ բանտերից ազատ արձակեց շուրջ հարյուր հիսուն քաղբանտարկյալի:

«Սոցիալական ծանր իրավիճակ և հարյուր հիսուն քաղբանտարկյալ. դա լուրջ վտանգ էր ներկայացնում Ալիևի համար: Նա ադեկվատ պատկերացում չուներ միջազգային և հայկական լսարանի համար դա ինչ էր նշանակում»,- ասաց Բոզոյանը` հավելելով, որ Ալիևին միայն փոքրիկ հաղթանակը կարող էր իր պատկերացմամբ փրկել, ոչ թե պատերազմը, այլ հաղթանակի իմիտացիան:

Երվանդ Բոզոյանը հիշեցրեց Ալիևների ընտանիքի անվան հետ կապված օֆշորային սկանդալները, և նշեց, որ Ալիևը իշխանության միջոցով հսկայական փողեր է աշխատում, և իշխանությունը իր համար փողի հսկայական աղբյուր է, սակայնի ի վերջո, այս պատերազմի համար կարևոր էր Ալիևի համար իշխանության պահպանման հարցը: