Հիշեք այս օրը, հանդիպելու ենք նույն տեղը` 10 ամսից. Ինչպես են ընկերները Գոռ Հակոբյանի որդուն ճանապարհում Գերմանիա` բուժման (տեսանյութ)

Դերասան Գոռ Հակոբյանի ընտանիքն արդեն մեկնել է Մյունխեն՝ որդու՝ Ֆելիքիսի բուժման համար։ Նրա ընկերները, այդ թվում դերասան Գրիգոր Դանիելյանը, Աղաս Մանուկյանը օդանավակայանում հրաժեշտ են տվել նրանց՝ մաղթելով շուտափույթ ապաքինում Ֆելիքսին։

Բուժումը տևելու է 10 ամիս։

«Շուտով՝ ընդամենը 10 ամսից հանդիպում ենք էլի այստեղ»,-ասում է Գրիգոր Դանիելյանը։

«Վախ, երանի էդ օրը»,-արձագանքում է Ֆելիքսի մայրը։

Ընկերները հիշեցնում են, որ Աղաս Մանուկյանը խոստացել է այդ օրը կիսամերկ պարել օդանավակայանում։

Հիշեցնենք, որ մարտի 10-ին Գոռ Հակոբյանը հայտարարեց, որ որդու՝ Ֆելիքսի  մոտ ախտորոշվել է  Յուինգի սարկոմա հիվանդություն, բազմաթիվ հետազոտություններ են անցել նաև Մոսկվայում, չարաբաստիկ հիվանդությունը հաստատվել է։

Գերմանիայի Մյունխեն քաղաքում բուժում ստանալու համար նա իր ողջ ունեցվածքը հանել է վաճառքի, սակայն ժամանակը շատ քիչ է, այդ պատճառով նա դրամահավաք էր հայտարարել։ 36 ժամվա ընթացքում հավաքվեց անհրաժեշտ գումարից էլ շատ։ Դերասանը խոստացել է, որ ավել գումարը կփոխանցի մեկ այլ երեխայի բուժման համար։

Յուինգի սարկոման՝ ոսկրային չարորակ ուռուցքի տեսակ է, որի վաղ հայտնաբերումը խիստ կարևոր է։ Յուինգի սարկոման առավել հաճախ հանդիպող սարկոմայի տեսակ է դեռահասների և երիտասարդների շրջանում։ Այն հաճախ ախտահարում է ոսկրերը՝ հատկապես ոտքերի, ձեռքերի և կոնքի շրջանում։ Որոշ դեպքերում ներգրավվում են նաև փափուկ հյուսվածքները։ Հիվանդության վաղ ախտորոշումը չափազանց կարևոր է, քանի որ այն մեծ ազդեցություն ունի բուժման հաջողության վրա։