էլեկտրոմոբիլների գույքահարկը նշանակալի կնվազի. ՆԳՆ նախարարը ներկայացրեց շարժիչների հաշվառման փոփոխված կարգը

ՀՀ կառավարության նիստին ՆԳՆ նախարար Արփինե Սարգսյանը ներկայացրեց «էլեկտրոմոբիլների շարժիչների հզորության հաշվարկման առանձնահատկությունները սահմանելու մասին» հարցը, ըստ որի՝ էլեկտրոմոբիլների գույքահարկը նշանակալի կնվազի։

Նախարարը նշեց, որ նախագծի առաջարկը եկել է քաղաքացիներից, որոնք դիմել են շարժիչների հաշվառման կարգը փոփոխել, որպեսզի գույքահարկի հաշվարկման կանոններում ևս միատեսակություն լինի։

Նա նշեց, որ ներկա պահին էլեկտրոմոբիլների հաշվարկման տեսանկյունից շարժիչի հզորությանը վերաբերող երկու ցուցանիշ կա՝ առավելագույն կամ պիկային հզորություն և կայուն հզորություն։

«Ընդհանուր առմամբ, համաշխարհային մակարդակում նախապատվություն տրվում է կայուն հզորությանը, որը թույլ է տալիս ուղղակի երկար ժամանակ մեքենան վարել՝ չվնասելով մարտկոցը։ Սա ընդունելի չափանիշ է, իսկ պիկային հզորությունը, ըստ էության, կարճատև ժամանակահատվածում արագացմանը նպաստող առավելագույն հզորությունն է, որը ավելի շատ մարկետինգային տրամաբանության մեջ է և որպես կանոն ավելի բարձր է լինում, քան իրական պատկերն է»,-բացատրեց նախարարը։

Սարգսյանը նշեց, որ գործող կարգով որպես ընդհանուր սկզբունք վերցվել է պիկային հզորության չափիչը։ «Բայց ԵԱՏՄ ընդհանուր կանոնակարգն այնպիսին է, որ ԵԱՏՄ ռեեստրում գրանցվում են անհատապես այն էլեկտրոմոբիլները, որոնք ունեն էլեկտրոնային անձնագիր և այնտեղ նշվում է միայն կայուն հզորությանը վերաբերող ցուցանիշը»։

Սարգսյանի խոսքով՝ այժմ իրենք առաջարկում են ընդհանուր կանոնակարգում նշել շարժիչի հզորությունները հետևյալ կերպ.

«Առաջին հերթին, եթե ԵԱՏՄ ռեեստրում անձն ունի էլեկտրոնային անձնագիր, որտեղ կայուն հզորության ցուցիչը կա, այս շարժիչի հզորությունն է հիմք վերցվելու գույքահարկի հաշվարկման տեսանկյունից։ Բայց եթե չկա այսպիսի բան, որովհետև տվյալ էլեկտրոմոբիլի համար անհատական է լրացվում էլեկտրոնային անձնագիրը, չենք կարող սա միատեսակ դարձնել բոլոր սեփականատերերի համար։ Նախատեսել ենք հետևյալ գործակցային տրամաբանությունը և պրոգրեսիվության կանոնն ենք կիրառել՝ մինչև 250 ձիաուժ ունեցող տրանսպորտային էլեկտրոմոբիլների դեպքում հաշվարկվելու է առավելագույն պիկային հզորությունը բաժանած 1,5 գործակցի, իսկ եթե 250-ից ավելի ձիաուժ ունեցող տրանսպորտային միջոցների մասին ենք խոսում՝ դրանից մնացյալ մասով կիրառում ենք 2,5 գործակիցը»,-ասաց նախարարը։

Արփինե Սարգսյանը ավելի հասկանալի լինելու համար բերեց օրինակներ։

«Օրինակ, եթե ունենք 544 ձիաուժ պիկային հզորությամբ էլեկտրոմոբիլ և եթե 2025-ի արտադրության է, գույքահարկը ներկա դրությամբ հաշվարկվում է 666 հազար դրամ՝ պիկային հզորության տրամաբանությամբ։ Բայց մեր գործակցային տրամաբանությամբ քաղաքացին այլևս կվճարի 276 հազար դրամ։

Մեկ այլ օրինակ՝ եթե խոսում ենք մինչև 250 ձիաուժ պիկային հզորությամբ էլեկտրոմոբիլների մասին, պայմանական վերցնենք 218 հզորությամբ, այս ձևով 2025 արտադրության էլեկտրոմոբիլի դեպքում այս պահի դրությամբ վճարվում է 133 400 դրամ, բայց նոր հաշվարկով քաղաքացիները կվճարեն 43 500 դրամ»,-ասաց նա։

ՆԳՆ նախարարը նշեց, որ, ընդհանուր առմամբ, այս կանոնակարգերը կտարածվեն շուրջ 20 000 ֆիզիկական անձանց և 4000 իրավաբանական անձանց նկատմամբ։

Նախարարը նաև ներկայացրեց անցումային կարգերը՝ շեշտելով, որ կարգավորումը նաև տարածվելու է գործող էլեկտրոմոբիլներ ունեցող քաղաքացիների նկատմամբ։

«Բայց որևէ հետհաշվարկ չենք իրականացնելու, 2026-ի հունվարի մեկից սկսած հաշվարկը կիրականացվի և մինչև տարեվերջ քաղաքացիները կունենան ժամանակահատված՝ այս նոր ձևաչափով կատարելու վճարում։ Իսկ եթե այս կարգավորումն ուժի մեջ մտնելուց հետո է անձը ձեռք բերում էլեկտրոմոբիլ, դրա հաջորդող ամսվա մեկին նոր հաշվարկը կիրականացվի»,-ասաց նա։

Նշվեց, որ կարգավորումը ուժի մեջ է մտնում 2026-ի ապրիլի 1-ից, որպեսզի քաղաքացիներին չծանրաբեռնեն լրացուցիչ դիմումներով։

«Մեր թվային հարթակներն այնպես կվերադասավորենք, որ ավտոմատ ցուցանիշային փոփոխություններ կունենանք և քաղաքացին կմտնի roadpolice հարթակի իր անձնական էջ և կկարողանա տեսնել հաշվարկման ձևաչափը»,-ասաց նա։

Նախարարը նաև հավելեց, որ կարգավորումները նախատեսել են ուժի մեջ թողնել 2028թ. դեկտեմբերի 31-ը. «Որ դրանից հետո հասկանանք թողնո՞ւմ ենք նույն ռեժիմը, թե՞ լավարկման որոշակի քայլեր ենք ձեռնարկում։ Սա կնպաստի խթանելու էլեկտրոմոբիլների շրջանառությանը՝ հանրապետությունում»,-հայտարարեց նա։