Իրանի սահման տանող մայրուղում բեռնատարների 3 կիլոմետրանոց հերթ է (տեսանյութ)

Մեղրի-Ագարակ մայրուղու վրա` դեպի Իրանի սահման, 3 կիլոմետրանոց հերթ է գոյացել, հաղորդում է Sputnik Արմենիայի թղթակիցը դեպքի վայրից։

«Եթե մաքսային ծառայությունը արդյունավետ լինի, մենք արագ կհաղթահարենք խնդիրը։ Հակառակ դեպքում, մենք կարող ենք այնտեղ ժամերով մնալ կամ նույնիսկ մեկ կամ երկու օրով», - «Սպուտնիկ Արմենիային» ասաց բեռնատարի վարորդ Մոհամմեդ Չարեմզադեն։

Նա նշեց, որ Իրանից տեղափոխում է ամրան և այլ շինանյութեր: Ասաց, որ տեղյակ չէ սննդամթերքի արտահանման հնարավոր սահմանափակումների մասին։

Մեկ այլ վարորդ, որը ցանկացավ անանուն մնալ, ասաց, որ Իրանից Հայաստան ավանդաբար արտահանում են պանիր, կարագ, մածուն և այլ գյուղատնտեսական արտադրանք: Սակայն, ռազմական իրավիճակի և ներքին պաշարներ կուտակելու անհրաժեշտության պատճառով, Իրանը սահմանափակումներ է դրել մի շարք ապրանքների, հիմնականում՝ սննդամթերքի արտահանման վրա։ Նա նաև նշեց, որ Թավրիզի և Թեհրանի որոշ բիզնեսներ ժամանակավորապես դադարեցրել են գործունեությունը, ինչը ազդում է մատակարարման ծավալների վրա։

Վարորդները վստահ չեն, թե ինչպես են այս սահմանափակումները ազդելու հայկական շուկայի վրա։