Իրանի թուլացումը կամ պարտությունը վնաս կհասցնի նաև Հայաստանին. ՀՀ-ում Իրանի դեսպան

«Միջանցքի գաղափարը ենթադրում է ինքնիշխանության հարցում որոշակի զիջումներ, ինչը Հայաստանի ու Իրանի համար ընդունելի չէ»,- ասուլիսում ասաց  Հայաստանում Իրանի դեսպան Խալիլ Շիրղոլամին:

Նա նշեց, որ դրա համար արհեստական անուն էր ներկայացվել՝ «Զանգեզուրի միջանցք», որի վերաբերյալ Իրանը վճռականորեն հայտարարել էր՝ ոչ մի գեոպոլտիկ փոփոխություն, ինչպես նաև ինքնիշխանության հարցում որևէ փոփոխություն, Իրանը չի հանդուրժի։

Դեսպանի խոսքով, ԹՐԻՓՓ ուղղության հետ կապված մշտապես քննարկումներ են ունեցել ՀՀ պաշտոնատար անձանց հետ և մշտապես ընդծել են, որ պետք է շարժվեն երկու երկրների ղեկավարների նախանշած ուղղությամբ:

«Այս ճանապարհը, որը հնարավոր է Հայաստանի համար հաղորդակցային տեսանկյունից հնարավորություններ ստեղծի, որևէ դեպքում չպետք է դառնա աղբյուր, գործիք օտարների կողմից Իրանի դեմ օգտագործելու հարցում»,- ասաց Խալիլ Շիրղոլամին:

Դեսպանը  հայտարարեց, որ Իրանը վերահաստատել է իր աջակցությունը «Խաղաղության խաչմերուկ» կոչվող նախագծից, եթե այն կարող է ապահովել Հայաստանի շահերը:

«Հայաստանի իշխանությունները մեզ մշտապես հավաստիացնում էին, որ ոչ մի պարագայում այս ճանապարհը ռազմական և անվտանգային իմաստ չի ստանա,  Հայաստանի ինքնիշխանությունն այդ ճանապարհի վրա կպահպանվի: Ուստի մենք չենք ցանկանում այս պահին ընկնել այդ գուշակությունների մեջ, թե արդյոք Ամերիկան ունի նման պլաններ, թե ոչ: Մեր և Հայաստանի մեջ վստահություն կա և այն գոյություն ունի»,-ասաց ՀՀ-ում Իրանի դեսպանը։

Խալիլ Շիրղոլամին վստահ է, որ Իրանի թուլացումը կամ պարտությունը վնաս կհասցնի նաև Հայաստանին։

«Կարծում եմ՝ որևէ մեկի համար գաղտնիք չէ, որ պատմության ընթացքում Հայաստանի նկատմամբ առկա որոշների նկրտումները, թեև այս պահին կարող ենք ասել, որ մոխիրների տակ թաքնված կրակի նման է, այսինքն կիսամարված վիճակում է, սակայն դրանք դեռ առկա են։ Ըստ այդմ էլ, մեր սրտի ցանկությունն է, որպեսզի Հայաստանը լինի ուժեղ պետություն։ Աստված վկա և Աստված  մեզ օգնական, որպեսզի այս պատերազմում Իրանը պարտություն չկրի, Հայաստանն էլ դրա հետևանքով որևէ վնաս չի կրի»,- ասաց նա։