Հոսպիտալացված զինվորները բողոքում են, ուզում են նույնիսկ այդ վիճակում զորամասեր գնալ

Վերջին օրերին ռազմական գործողությունների ընթացքում ընդհանուր վիրավորների թիվը կազմել է 121: Նրանցից 5-ի վիճակը ծայրահեղ ծանր է, 10-ը ծանր վիրավորներ են, մնացած բոլորը թեթեւ բեկորային վիրավորումներ են ստացել, որոնց մոտ 90 տոկոսը առաջիկա մեկ շաբաթում կապաքինվեն եւ կվերադառնան իրենց մշտական տեղակայման վայրերը: Այս մասին, այսօր՝ ապրիլի 7-ին, լրագրողների հետ հանդիպման ժամանակ նշել է ՀՀ ՊՆ ռազմաբուժվարչության պետ, գնդապետ Կամավոր Խաչատրյանը:

Նրա խոսքերով՝  ծայրահեղ վիճակում գտնվող զինվորներից երեքը ժամկետային զինծառայողներ են, մեկը` պայմանագրային, իսկ մեկն` աշխարհազորային: Նրանք միացված են արհեստական շնչառական ապարատին:

Խաչատրյանը վստահեցնում է, որ զինվորները բողոքում են. ուզում են նույնիսկ այդ վիճակում զորամասեր գնալ:

«Դրա անհրաժեշտությունը չկա, որ վիրակապով զինվորին ուղարկենք առաջնագիծ, իսկ հակառակորդն էլ ուրախանա, թե վիրավոր զինվորի ենք ուղարկում առաջնագիծ: Մենք մեր զինվորի վիրակապի մինչև վերջին թելը կքանդենք, կառողջացնենք ու նոր միայն նրանք կվերադառնան ծառայության»,- ասաց  Կամավոր Խաչատրյանը

Նա նկատում է, որ աշխարհի բանակներում չկա այդպիսի հասկացություն, որ առաջնագծում կատարվեն պլաստիկ վիրահատություններ, որոնցով կարելի կլիներ փրկել վիրավորի վերջույթը, բայց մենք ընդհուպ մեկ վիրավորի ենթածնկային զարկերակի մեծ դեֆեկտի պարագայում պլաստիկ վիրահատում ենք կատարել։ Քանի որ պայքարը գնում է ոչ միայն վիրավորի կյանքի համար, այլեւ հետագա հաշմանդամությունը կանխելու, մենք կարողացել ենք այդ պայմաններում կատարել երկու վիրահատություն, որի արդյունքում ստորին վերջույթները պահպանվել են»,-ասել է Կամավոր Խաչատրյանը՝ հավելելով, որ հնարավորության սահմաններում փորձել են կանխել բոլոր տեսակի ամպուտացիաները:

Կամավոր Խաչատրյանի խոսքով, ապրիլի 6-ին, հակառակորդը կրակել է սանիտարական մեքենաներից մեկի վրա, որի վրա Կարմիր խաչի տարբերանշան է եղել, մինչդեռ միջազգային կոնվենցիայով արգելված է կրակել Կարմիր խաչի վրա: «Ունեցել ենք մեքենայի կորուստ, բայց մարդկային կորուստ չենք ունեցել»,-ասել է նա: