Երեք այգիների անորակ աշխատանքների դիմաց Երևանի քաղաքապետարանը նույն ընկերությանը վճարել է 1.3 մլրդ դրամ. Չախոյան (տեսանյութ)

Երևանի ամենամեծ այգու բարեկարգման աշխատանքների տենդերը 2023թ-ին շահել է «Երվադա» ՍՊԸ-ն, և երեք այգիներն արդեն քանդվում են։ Այս մասին ֆեյսբուքյան իր էջում գրել է հանրային ակտիվիստ Արթուր Չախոյանը, ով նաև տեսանյութ է տարածել։

Նա, մասնավորապես, նշել է. «Այդ «բարեկարգումների» համար Երևանի քաղաքապետարանը վճարել է 1.273.000.000 (մեկ միլիարդ երկու հարյուր յոթանասուներեք միլիոն) դրամ կամ 3.350.000 (երեք միլիոն երեք հարյուր հիսուն հազար) ԱՄՆ դոլար։

Հանրության համար խնդիրը ավելի հասկանալի դարձնելու նպատակով նշեմ, որ Նոր Նորք, Դավիթաշեն և Մալաթիա-Սեբաստիա վարչական շրջանների թաղապետները հանդիսանում են Արամ Սարգսյանի «Հանրապետություն» կուսակցության անդամներ, և այդ այգիները գտնվում են հենց այդ վարչական շրջաններում։

Նշեմ որ «Վերածննդի» և «Հաղթանակի 40-ամյակի» այգիները գտնվում են անմիջապես Նոր Նորք և Մալաթիա-Սեբաստիա շրջանների թաղապետարանների կողքին, այսինքն՝ այս ամենը տեղի է ունեցել Արամ Սարգսյանի կուսակցության թաղապետների աչքի առաջ»։