Մենք շատ լավ բանակցություններ ենք ունեցել Իրանի հետ և Իրանը, կարծես, շատ է ցանկանում համաձայնության գալ. Թրամփ

Վաշինգտոնը կարծում է, որ Թեհրանը ցանկանում է համաձայնության գալ Իրանի միջուկային ծրագրի շուրջ, սակայն ԱՄՆ-ն չի շտապում համաձայնության գալ։

ԱՄՆ նախագահ Դոնալդ Թրամփն այս մասին հայտարարել է՝ պատասխանելով լրագրողների հարցերին իր ինքնաթիռում, որը մեկնում էր Ֆլորիդա։ «Մենք շատ լավ բանակցություններ ենք ունեցել Իրանի հետ։ Իրանը, կարծես, շատ է ցանկանում համաձայնության գալ։ Մենք պետք է տեսնենք, թե ինչպիսին է այդ համաձայնագիրը», - ասել է Վաշինգտոնի վարչակազմի ղեկավարը։

«Անցյալ անգամ նրանք որոշեցին չանել դա։ Բայց այս անգամ նրանք կարող են հակված լինել անել ինչ-որ այլ բան»,- հավելել է նա։

«Մենք շատ ժամանակ ունենք։ Եթե նայեք Վենեսուելային, մենք մի քիչ սպասեցինք։ Այս անգամ էլ մենք չենք շտապում», - ընդգծել է Թրամփը։ «Մենք ունենք մեծ նավատորմ, որը շարժվում է այդ ուղղությամբ։ Այն շուտով այնտեղ կլինի», - նշել է նա։

Խոսելով հնարավոր համաձայնագրերի պայմանների մասին՝ ԱՄՆ նախագահը շեշտել է. «Մեկ բան հստակ է՝ ոչ մի միջուկային զենք։ Եթե մենք կարողանայինք նման համաձայնագիր կնքել երկու տարի առաջ, մենք կանեինք, բայց նրանք չցանկացան դա անել։ Հիմա նրանք դա անում են։ Նրանք պատրաստ են անել շատ ավելին, քան կանեին մեկուկես տարի առաջ, կամ նույնիսկ մեկ տարի առաջ»,-նշել է Թրամփը: