Օմանի բանակցություններից հետո Թրամփը բարձր մաքսատուրք է սահմանել Իրանի հետ առևտուր անող երկրների համար

Օմանի մայրաքաղաք Մասկատում տեղի ունեցած Իրանի և ԱՄՆ-ի անուղղակի բանակցություններից հետո ԱՄՆ նախագահ Դոնալդ Թրամփը հրամանագիր է ստորագրել՝ բարձր մաքսատուրքեր սահմանելով այն երկրների համար, որոնք առևտուր են անում Իրանի հետ։

ԱՄՆ նախագահի՝ Սպիտակ տան էջում հրապարակված հրամանագրում մասնավորապես ասված է.

«Սկսած այս հրամանագրի ուժի մեջ մտնելու օրվանից, Միացյալ Նահանգներ տարբեր երկրներից ներմուծվող ապրանքների վրա, որոնք ուղղակիորեն կամ անուղղակիորեն Իրանից գնում, ներմուծում կամ այլ կերպ ձեռք է բերում որևէ ապրանք կամ ծառայություն, կարող է կիրառվել լրացուցիչ արժեքային տուրք, օրինակ՝ 25 տոկոս»։

Առևտրի նախարարին հանձնարարվել է պարզել, արդյոք տվյալ երկիրն առևտուր անո՞ւմ  է Իրանի հետ, թե՞ ոչ, ապա տեղեկատվության հիման վրա եզրակացություն է տրամադրում պետքարտուղարին։

Հրամանագրի նախաբանում Թրամփը նշել է, որ լրացուցիչ տեղեկություններ է ստացել տարբեր բարձրաստիճան պաշտոնյաներից, ի թիվս այլ բաների, Իրանի կառավարության գործողությունների և քաղաքականության վերաբերյալ, ներառյալ 12957 գործադիր հրամանագրով հայտարարված և հետագա հրամանագրերում մանրամասն նկարագրված ազգային արտակարգ դրության հետ կապված հանգամանքները:

«Այս լրացուցիչ տեղեկատվությունը, ի թիվս այլ բաների, քննարկելուց հետո ես եզրակացնում եմ, որ 12957 գործադիր հրամանագրով հայտարարված և հետագա հրամանագրերում ավելի մանրամասն նկարագրված ազգային արտակարգ դրությունը շարունակվում է, և որ Իրանի կառավարության գործողություններն ու քաղաքականությունը շարունակում են անսովոր և արտակարգ սպառնալիք ներկայացնել Միացյալ Նահանգների ազգային անվտանգության, արտաքին քաղաքականության և տնտեսության համար, որի աղբյուրը ամբողջությամբ կամ էականորեն Միացյալ Նահանգներից դուրս է»,-ասված է հրամանագրում։