Կարմիր շապիկով, բոթասներով, գետնին նստած, ավտոմեքենային «փարված»՝ ոստիկանության պաշտոնյան երգում է մեր հողերը հետ բերելու մասին ու․․․ ծառայում Նիկոլ Փաշինյանին

Սերժ Սարգսյանը թերևս սխալվեց, երբ հայտարարեց, թե մենք կրկեսի վերածելու հայրենիք չունենք։ Մեր հայրենիքը կրկեսի է վերածվել ոչ միայն գլոբալ առումով և օրինակներով, այլև մասնավոր՝ սկսած ստորին օղակներից։ 

Այսպես․ NEWSPRESS.am-ի հայտնի դարձավ, որ ոստիկանության Ախուրյանի բաժնի պետի տեղակալ Մանուկ Խաչատրյանը համատեղությամբ նաև երգում է։ Մեղք չգործենք երգիչների առաջ ու չասենք՝ երգիչ է։

Համացանցում նրա մի քանի տեսահոլովակ կա, որոնք հենց ինքը՝ Խաչատրյանն է հրապարակել։ Նրա երգերից մեկն, օրինակ, երջանիկ պատահականությամբ, կոչվում է "Невеста хулиганка", որտեղ երիտասարդը կոտրատված ռուսերենով գովերգում է իր խուլիգան հարսնացուին։ 

Մեկ այլ երգ էլ կոչվում է «Վրեժ», որտեղ Խաչատրյանը երգում է, թե Արարատ սարը վկա՝ Մուշը, Սասունը, Արդահանը, Կարսը, Երզնկան ոչ ոք չի  մոռանա, իսկ թուրքը թող իմանա, որ հայի ձեռքով կգա, հողերն էլ ետ կբերենք։ 

Հատկանշական է, որ այս երիտասարդը երգում է Արևմտյան Հայաստանի մասին, թուրքի հետ թշնամության ու վրեժի մասին, բայց շարունակում է ծառայել Նիկոլ Փաշինյանի իշխանությանը, որը ոչ միայն որևէ տարածք չի պահանջում Թուրքիայից, այլև 20-րդ դարի մեծագույն ողբերգությունը՝ Հայոց ցեղասպանությունն է հարցականի տակ դնում։ 

Կենացով հայրենասեր։ Դասական։ 

Հպանցիկ էլ անդրադառնանք ոստիկանության պաշտոնյայի տեսահոլովակին․ երգող ոստիկանը նստած է ավտոմեքենայի առաջ՝ հագած կարմիր շապիկ ու բոթասներ, որոշ կադրերում փարված մեքենային՝ հավանաբար մեքենան Արարատ լեռն է պատկերացնում։ Որոշ կադրերում նա նստած է կուսակառույց ինչ-որ շինության պատուհանին։ 

Կատարման մասին էլ ոչինչ չասենք ու նրա ձայնային որակների գնահատականը թողնենք ընթերցողին։ 

Թարմացված․ Մեր հրապարակումից հետո Մանուկ Խաչատրյանն իր տեսանյութերը հեռացրել է Յութուբից։