Չախոյանը դատախազության շենքի դիմաց եկել էր ձվերով

Հասարակական ակտիվ գործիչ Արթուր Չախոյանն այս պահին, ձեռքին մի քանի ձվերով լի տուփը պահած, գլխավոր դատախազության շենքի դիմաց է։

«Ինձ մի քանի օր առաջ անհայտ անձը նամակ է ուղարկել մեսինջերով, ասել են՝ սուս մնա, մենք գիտենք, ում հետ ինչ ես խոսում և այլն, և այլն։ Ես դա տրամադրել եմ ոստիկանությանը»,-լրագրողների հետ զրույցում հայտնեց Արթուր Չախոյանը։

Նա ուշադրություն է հրավիրում փաստին, որ այդ նամակը ստացել է այն բանից հետո, երբ գոցացել են իր հեռախոսը, կարծում է ծանոթացել են հեռախոսում եղած նյութերին, խոսակցություններին։ Գողության գործը մինչ օրս չի բացահայտվել, նա համոզված է, որ ծածկադմփոց է արվում։

Չախոյանը ներկայացրեց՝ այդ գործով մի քանի անգամ դիմել է դատախազություն, ոստիկանությանը տրամադրել է տեսանյութ, սակայն այն գործի նյութերին չի կցվել, պնդեց՝ տեսանյութում երևում են գողության մասնակիցների դեմքերը։

«Այս ակցիայի նպատակն է գործի շուրջ հնչեղություն ապահովել։ Այն շարունակվելու է այլ պետական մարմինների դիմաց»,-ասաց հասարակական գործիչը։

Ինչո՞ւ է դատախազություն եկել հավկիթներով։ Չախոյանն ասաց՝ զուր են ոստիկաններ ուղարկել, քանի որ դրանք կոտրելու մտադրություն չունի։

«Պետք է իրենց փոխանցեմ, որ ձվին նայելով, հասկանան, թե իրենք ովքեր են։ Էդքան բան։ Քաղաքացին քաղաքակաիրթ ձևով դիմում է գրում, ընթացք չեն տալիս, քրեական գործին ընթացք չեն տալիս, իրենք արժանանալու են ձվի»,-ասաց Չախոյանը։

Նա ձվերով լի տուփը թողեց դատախազության շենքի ընդունարանում։