Հայերը պատրա՞ստ են միանալ ռազմաքաղաքական միության, որն այսօր շատ ագրեսիվ է տրամադրված Ռուսաստանի Դաշնության նկատմամբ. Օվերչուկ

ԵՄ-ին հնարավոր անդամակցելու որոշումը հայ ժողովրդի ընտրությունն է, բայց Երևանը պետք է հաշվի առնի Եվրոպական Միության փոփոխվող բնույթը, որը տնտեսական միությունից վերածվում է ռազմաքաղաքականի։

ՏԱՍՍ-ի փոխանցմամբ՝ լրագրողներին ասել է Ռուսաստանի փոխվարչապետ Ալեքսեյ Օվերչուկը։

«Եթե նրանք երբևէ պաշտոնապես սկսեն նման բանակցություններ, դրանք կտևեն երկար տարիներ։ Եվ մենք, իհարկե, պետք է նայենք Եվրամիության դինամիկային, թե ինչի է այն վերածվում։ Եվ այստեղ, ի թիվս այլ բաների, մենք, իհարկե, պետք է դիտարկենք և վերահսկենք այսօր Եվրահանձնաժողովից և Բրյուսելից հնչող հայտարարությունները, որոնք կապված են այն փաստի հետ, որ Եվրամիությունը տնտեսական միությունից վերածվում է ռազմաքաղաքական միության։ Սա նույնպես պետք է հաշվի առնել։ Եվ Եվրամիության բնույթը փոխվում է մեր աչքերի առաջ», - նշել է նա։

«Հայերը պատրա՞ստ են միանալ ռազմաքաղաքական միության, որն այսօր շատ ագրեսիվ է տրամադրված Ռուսաստանի Դաշնության նկատմամբ։ Հնարավոր է՝ հայերը նույնպես ստիպված լինեն իրենց տալ այս հարցը։ Ամեն դեպքում, իհարկե, բազմիցս ասվել է, որ մեկ կամ մյուս ինտեգրացիոն միավորման օգտին ընտրությունը միշտ հայ ժողովրդի ընտրությունն է», - հավելել է Ռուսաստանի փոխվարչապետը։

«Եվ այստեղ, ակնհայտ է, որ մի շարք որոշումներ պետք է կայացվեն որոշակի պահի, քանի որ, իրոք, սա շատ է քննարկվել, թե՛ այստեղ, թե՛ Հայաստանում, Նիկոլ Վովաևիչը խոսել է այդ մասին. բոլորը հասկանում են, որ Հայաստանը չի կարող միաժամանակ լինել երկու ինտեգրացիոն միավորումների անդամ։ Հետևաբար, եթե նման ընտրություն երբևէ կատարվի, այն կլինի համապարփակ՝ հաշվի առնելով այն դինամիկան, որը մենք այսօր տեսնում ենք Եվրամիության փոփոխվող բնույթում», - եզրափակել է Օվերչուկը։