Պարզվում է՝ Ավանեսյանը շփոթվել ու Փաշինյանին սխալ թվեր է ներկայացրել

«Առողջության իրավունք» ՀԿ-ի նախագահ Անուշ Պողոսյանը «Շփոթված թվեր, շփոթված նախարար, շփոթված կառավարում» վերտառությամբ գրառում է արել, որում ասվում է.

«Անահիտ Ավանեսյանը 2026թ. հունվարի 15-ին կառավարության նիստում հայտարարեց, որ ապահովագրության շրջանակում առողջապահական հիմնարկներ է այցելել 87 048 քաղաքացի, որոնցից

7 739-ը՝ ամբուլատոր,

8 612-ը՝ հիվանդանոցային այցեր են իրականացրել։

Թվերի հանրային կարևորությունից ելնելով՝ պաշտոնապես դիմեցի Առողջապահության նախարարություն՝ խնդրելով պարզաբանել, թե ինչ բնույթի ծառայություն կամ այց են իրականացրել մնացած 70 697 քաղաքացիները, որոնք չեն դասվում ոչ ամբուլատոր, ոչ հիվանդանոցային այցերի շարքին։

Նախարարությունը մեկ ամիս ժամանակ խնդրեց՝ պատճառաբանելով, որ անհրաժեշտ է «ուսումնասիրել թվերը»։

Եվ ահա, այդ «խորը մասնագիտական վերլուծության» արդյունքում պարզվեց, որ նախարարը վարչապետին ներկայացրել է սխալ տվյալներ․ պարզապես շփոթվել է։

Սակայն իրավիճակի ամենաաբսուրդային մասը դեռ առջևում էր։

Ազգային ժողովում, նույն հարցին պատասխանելիս, նախարարը լուրջ դեմքով հայտարարեց, որ կան նաև այլ ծառայություններ՝

ցերեկային ստացիոնար, շտապ բուժօգնության կանչեր և այլն, ու նույնիսկ փորձեց հարցը ներկայացնել որպես անտեղի ու անհասկանալի։

Այսպիսով ստացվում է՝

Կառավարության նիստում ներկայացվում են սխալ թվեր,

մեկ ամիս նախարարությունը «ուսումնասիրում է» սեփական նախարարի խոսքը, իսկ ԱԺ-ում նույն նախարարը պնդում է, որ ամեն ինչ ճիշտ է, պարզապես պատգամավորներն են «սխալ հարցեր տալիս»։

Սա այլևս ոչ թե վիճակագրական սխալ է, այլ պետական կառավարման լուրջ խնդիր, երբ առողջապահության ոլորտում թվերը չեն համապատասխանում իրականությանը, իսկ հակասությունները բացատրվում են ինքնավստահ հեգնանքով։

Առողջապահությունը փորձարարական հարթակ չէ,

իսկ հանրությունը պարտավոր չէ հաշտվել «շփոթվել եմ»-ով»։