Ձեր աչքի առաջ է հայկականության վերացումը ու դուք զբաղված եք ներքին գզվռտոցով. Արթուր Ղազարյան

Մեր կողքին, մեր աչքի առաջ կայանում է պետություն՝ Ադրբեջան, ժողովուրդ՝ ադրբեջանցի... մեր հայկական բնիկ տարածքների վրա, մեր մշակույթի յուրացմամբ, մեր պատմության խեղաթյուրմամբ, մեր սխալների շնորհիվ, այս մասին գրել է ծրագրավորող, մաթեմատիկոս Արթուր Ղազարյանը։

Ղազարյանի խոսքով՝ նրանց պետականամետ մոտեցումը՝ բազմալեզու գրահրատարակչությունը՝ սոցիալական մեդիաների լայն կիրառմամբ, քարոզչական լրատվամիջոցների գրագետ օգտագործմամբ և կենտրոնացված ֆինանսավորմամբ, բերում են իրենց սպասված արդյունքին։

«Նրանց մատուցած «կեղծիքը» համարվում է իրականություն։ Արհեստական բանականությունը, քանի որ այդ նյութերը ծավալուն են ու ավելի շատ, համարում է ավելի ճիշտ, հայկականը՝ ոչ հավաստի։ Սա շատ անսպասելի նորություն է, որը ազդելու է շատ արագ ու բերելու է անկանխատեսելի հետևանքների։

Հայաստանում արցախյան շարժման սկզբից մինչ օրս չի եղել պետական մոտեցում այս խնդրին։

Կամավորներիս անձնուրաց չարչարանքը չի կարող դիմադրել պետական թշնամական մեքենային։

Ես արձանագրում եմ մեր տոտալ պարտությունը՝ հայ պատմաբանների, հայ լրագրության, հայկական կուսակցական գործիչների, գիտնականների, մտավորականության։

Ձեր աչքի առաջ է հայկականության վերացումը ու դուք զբաղված եք ներքին գզվռտոցով։ Հայ օլիգարխները զբաղված են սեփական անձերի մեծարման ֆիլմեր նկարելով։ Չկա ընդհանուր մոտեցում և ստրատեգիա, չկա նպատակ, չկա ուղղորդված աշխատանք։

Ես գիտեմ՝ ինչ են անում թշնամիները ու մենք։ Ու բոլորը թքած ունեն սրա վրա...»,- նշել է Ղազարյանը։