Սա խաղաղություն չէ, սա հետաձգված պատերազմ է. Դավիթ Շահնազարյան

Մեր ազգային արժանապատվությունն ամեն վայրկյան ստորացվում է՝ թե՛ իշխանության, թե՛ նրա գործընկեր, մեր պետականությանը թշնամի երկրների կողմից։ Անընդհատ խաղաղության մասին են խոսում, բայց սա խաղաղություն չէ, այլ՝ հետաձգված պատերազմ։ Ադրբեջանը Հայաստանի դեմ վարում է շատ ակտիվ հիբրիդային պատերազմ՝ բոլոր ուղղություններով, հայտարարվում է, որ Հայաստանը, այսպես կոչված՝ «Արևմտյան Ադրբեջան» է և այդ ուղղությամբ միջազգային լայնածավալ քայլեր են իրականացնում։ Հայաստանի իշխանության կողմից ոչ միայն զրո դիմադրություն է, այլ նաև ճիշտ հակառակը՝ աջակցություն, «Հարցեր կան» հաղորդմանն ասել է քաղաքական գործիչ Դավիթ Շահնազարյանը։

«Թե՛ իշխանությունը, թե՛ ընդդիմությունը գտնվում են միևնույն բարոյահոգեբանական հարթության մեջ, ընտրությունները դիտարկում են պայքար հանուն մանդատի, մի մասի համար էլ բիզնես նածագիծ է՝ փող աշխատելու միջոց։ Իշխանությունն է որոշում ընդդիմության օրակարգը, ընդդիմության խոսելու թեման, Հայաստանում ներքին քաղաքականություն գոյություն չունի, մեզ համար ամենամեծ սպառնալիքը մեր քաղաքական դաշտն է։ Ո՛չ իշխանության, ո՛չ ընդդիմության համար պետականությունը բացարձակ արժեք չէ»։