Հայտնի են Սիսիանի ջոկատի զոհվածների անունները (լուսանկարներ)

Երեկ՝ ապրիլի 5-ին, հակառակորդը Մարտակերտի ճանապարհին անօդաչու սարքով ռմբակոծել է Սիսիանի ջոկատի ավտոբուսը:

Այս մասին լուրը դեռ երեկ հաստատեց ՀՀ ՊՆ-ն: Վերջինիս տեղեկություններով զոհվել է 5 մարդ, այդ թվում՝ երկու գյուղապետ:

Սակայն 1in.am-ի հետ զրույցում  Սիսիանի զինկոմի տեղակալ Մարատ Ենոքյանը տեղեկացրել է, որ զոհերը 6-ն են:

«Թե ինչպես է եղել դեպքը, մենք չգիտենք, ընդամենը մեզ զանգել են, անուն-ազգանուններն են ասել»,- մեզ հետ զրույցում ասաց Սիսիանի զինկոմի տեղակալ Մարատ Ենոքյանը՝ պնդելով, որ տեղյակ չէ դեպքի մանրամասներից:

Մեր դիտարկմանը, թե ՊՆ-ն հաստատում է սիսիանցի 5 կամավորների զոհվելու մասին տեղեկությունը, Ենոքյանն ասաց. «Զոհերը 6-ն են: Սկզբում տեղեկություն կար 5-ի մասին, հետո նոր 6-րդի անունն են ասել ավելի ուշ»:

Ըստ Սիսիանի զինկոմի տեղակալի՝ զոհվել են սիսիանցի կամավորներ Սեդրակ Ասրյանը, Եղիշ Նիկալյան, Սերգեյ Դանղյանը, Դավիթ Սարգսյանը, ինչպես նաև Դարբասի գյուղապետ Մայիս Միրզոյանը (ստորև՝ նկարը).

և Ախլաթյան գյուղի գյուղապետ 43-ամյա Արմեն Բեգլարյանը (ստորև՝ նկարը).

Ախլաթյանի գյուղապետարանի հաշվապահը մեզ հետ զրույցում ասաց, որ առավոտյան են խոսել գյուղապետի հետ հեռախոսով, իսկ կեսօրից հետո լսել են դեպքի մասին: Սյունիքի մարզի Ախլաթյան գյուղի գյուղապետ Արմեն Բեգլարյանը ապրիլի 10-ին նշելու էր 43-ամյակը:

Նյութն ամբողջությամբ՝ սկզբնաղբյուր կայքում