Քաղբանտարկյալ Նարեկ Սամսոնյանի մոտ դրվել է նախնական ախտորոշում՝ սրտամկանի ինֆարկտ. շտապ բժշկական օգնության բրիգադ է կանչվել. Պողոսյան

Քաղբանտարկյալ Նարեկ Սամսոնյանի մոտ քրեակատարողական հիմնարկում դրվել է նախնական ախտորոշում՝ սրտամկանի ինֆարկտ, ինչի կապակցությամբ կանչվել է շտապ բժշկական օգնության բրիգադ։ Սակայն շտապօգնության մեքենան ժամանել է կանչից շուրջ 1,5 ժամ անց։ Այս մասին ֆեյսբուքյան իր էջում գրել է Առողջության իրավունք ՀԿ-ի նախագահ Անուշ Պողոսյանը։

«Մինչդեռ գործող իրավական կարգավորումներով հստակ սահմանված է.

Երևան քաղաքում և ՀՀ մարզերի քաղաքային վայրերում «առաջնահերթ» կանչերի դեպքում շտապօգնության բրիգադի ժամանման առավելագույն տևողությունը չպետք է գերազանցի 15 րոպեն (ձմռանը՝ մինչև 20 րոպե)։
Գյուղական համայնքներում՝ մինչև 20 կմ հեռավորության դեպքում՝ նույնպես մինչև 15 րոպե, իսկ ավելի հեռու բնակավայրերում՝ առավելագույնը 30 րոպե։

Այս պայմաններում ծագում է լիովին հիմնավոր հարց.

Սա՞ է արդյոք խոստացված «բարեփոխված» շտապօգնության համակարգի աշխատանքը, թե՞ գործ ունենք քաղբանտարկյալի նկատմամբ պետական կառույցների կողմից հատուկ, անթույլատրելի վերաբերմունքի հետ։

Սա արդեն ոչ միայն բժշկական ծառայության որակի, այլև մարդու կյանքի իրավունքի խախտման վտանգի հարց է։

ՀՀ առողջապահության նախարարությունը և ՀՀ մարդու իրավունքների պաշտպանը պարտավոր են անհապաղ հրապարակային պարզաբանում տալ տեղի ունեցածի վերաբերյալ»: