Գվարդիայի ծառայողները ձերբակալեցին «Մերսեդեսի» փախուստի դիմած վարորդին և ուղևորին

Հունվարի 15-ին՝ ժամը 21․30-ին, Ոստիկանության գվարդիայի ծառայողները մայրաքաղաքի Գյուրջյան փողոցում նկատել են, որ «Մերսեդես» մակնիշի մի ավտոմեքենայի վարորդը դրսևորում է կասկածելի վարքագիծ՝ իջել է մեքենայից և ինչ-որ բան է փնտրում։ Այս մասին տեղեկանում ենք ՆԳՆ ոստիկանությունից։
Տղամարդը նկատելով իրավապահներին, նստել է մեքենան և դիմել փախուստի։ Գվարդիայի ծառայողները փորձել են կանգնեցնել մեքենան, սակայն վարորդը վարել է նրանց ուղղությամբ և վրաերթի ենթարկել երկու ծառայողի։ Չենթարկվելով «կանգ առ» հրահանգին՝ վարորդը մեքենան վարել է անկանոն, դուրս եկել հանդիպակաց երթևեկելի գոտի՝ վտանգելով մարդկանց կյանքն ու առողջությունը։

Գվարդիայի ծառայողերից մեկն իրեն ամրակցված զենքով արձակել է նախազգուշական կրակոց, սակայն վարորդը շարունակել է անկանոն երթևեկը։
Իրավիճակով պայմանավորված՝ կրակ է արձակվել ավտոմեքենայի անիվներին։ Նորք-Մարաշի 1-ին նրբանցքում «Մերսեդեսի» վարորդը կորցրել է կառավարումը, և մեքենան բախվել է էլեկտրասյանը։ Վարորդն ու ուղևորը իջել են մեքենայից և դիմել փախուստի, ինչը, սակայն, կանխվել է։
Մայրաքաղաքի բնակիչներ 34 և 35 տարեկան տղամարդիկ ձերբակալվել ու տեղափոխվել են Համայնքային ոստիկանության Նոր Նորքի բաժին։

34-ամյա տղամարդու անձնական խուզարկությամբ հայտնաբերվել է 1,92 գրամ փոշենման զանգված, որը ըստ նրա կոկաին է, ձեռք է բերել տելեգրամյան ալիքի միջոցով։
Տղամարդիկ և կազմված փաստաթղթերը ներկայացվել են նախաքննական մարմին։
Վրաերթից վնասվածքներ ստացած Գվարդիայի ծառայողները բուժօգնություն ստանալուց հետո դուրս են գրվել հիվանդանոցից։ Երկուսի վիճակն էլ գնահատվում է բավարար։