Առաջին անհրաժեշտության իրերի և սննդի հավաքագրում` սահմանի զինվորների համար

Մի շարք քաղաքացիների նախաձեռնությամբ այսօր, ապրիլի 4–ին Երևանի Մաշտոցի պուրակում կազմակերպվել է առաջին անհրաժեշտության իրերի և սննդի հավաքագրում:

Այն նախատեսվում է շարունակել նաև հաջորդ օրը` ապրիլի 5-ին, որից հետո հավաքագրված անհաժեշտ պարագաներն ու սնունդը կտեղափոխվի Արցախ:

Նախաձեռնող խումբը կապ է հաստատել Արցախյան զորամիավորումների հետ և որոշակիորեն ճշտել անհրաժեշտ իրերի ցանկը: Նախաձեռնող քաղաքացիները նկատում են, որ մեր բանակի ղեկավարությունը պատշաճ կերպով հոգում է զինծառայողների կարիքները, սական հաշվի առնելով այն հանգամանքը, որ այս օրերին առաջնագիծ են մեկնել նաև կամավորական ջոկատներ և հնարավոր է նրանք ունենան մատակարարման որոշ խնդիրներ, որոշել են հավելյալ աջակցություն հավաքագրել և ուղարկել առաջնագիծ:

Newspress.am-ի հետ զրույցում ակտիվիստ Մաքսիմ Սարգսյանը նկատեց, որ հավաքը նախատեսված էր ժամը 18:00-ին, սակայն քաղաքացիներն արդեն դրանից մեկ ժամ շուտ հավաքվել էին ու իրենց աջակցությունն էին փորձում ցուցաբերել:

«Մեր համաքաղաքացիները շատ ակտիվ մասնակցեցին այս հավաքագրմանը: Սա ոչ միայն մի փոքր կթեթևացնի առաջնագծի կարիքները այլև կապ կստեղծի թիկունքի և առաջնագծի միջև, որը շատ կարևոր է հաղթանակների ամրագրման համար: Հավաքագրումը կշարունակվի նաև վաղը, որից հետո այն կճանապարհենք սահման»,-ասաց Մաքսիմ Սարգսյանը` հավելելով, որ սննդից ընտրել են այն ամենը, ինչը մինչև տեղ հասնելը չի փչանա:

P.S. Ստորև ներկայացնում ենք անհրաժեշտ իրերի ցանկը.

1. առաջին բուժ օգնության անհատական փաթեթներ
2. անջրանցիկ թիկնոցներ
3. ջրի տարաներ
4. քնապարկեր, գորշ բրդյա ծածկոցներ
5. գուլպաներ /նասկիներ/, ներքնաշորեր
6. ծխախոտ
7. թեյ, լուծվող սուրճ
8. քաղցրավենիք- կոնֆետներ, շոկոլադե սալիկներ, չորաբլիթ /սուխարիկ/, քաղցր ձողիկներ, չրեղեն
9. անհատական հիգիենայի պարագաներ