Եթե բարձրացնենք թոշակը, թոշակառուն տունը տաքացնելու վրա շատ է ծախսելու. պարզվում է՝ «խեղճ Նիկոլը» «թոշակառուի շատ չծախսելու մասին է մտածում»

«Իմ մոտ շատ էր տպավորվել բոլորովին վերջերս՝ նախորդ տարի մեր հարգարժան թոշակառուներից մեկի հետ ունեցած  խոսակցությունը, երբ նա ասում էր, որ 50 հազարից ավել թոշակ է ստանում, որից 27-28 հազարը ծախսում է տունը տաքացնելու վրա, բայց արդյունքում տունը չի էլ տաքանում»,- կառավարության նիստում ասաց Նիկոլ Փաշինյանը «Հայաստանի տնտեսական և ինստիտուցիոնալ վերափոխման դոկտրինը հաստատելու մասին» որոշումը ներկայացնելու ժամանակ օրինակ բերելիս։

Փաշինյանի խոսքով՝ թոշակառուն ասել է, որ եթե կառավարությունը թոշակը 20 հազար դրամով բարձրացնի, ապա ինքը կկարողանա գոնե տաքանա։

Նշելով, որ այդ իրավիճակը հետազոտել է կոնկրետ հասցեով ու տնով՝ Փաշինյանը բացատրեց.

«Ես ինձ համար արձանագրեցի, որ եթե մենք վերցնենք և 20 հազար դրամով բարձրացնենք թոշակը, նույն քաղաքացին էլեկտրական էներգիայի և տունը տաքացնելու վրա ծախսելու է ոչ թե 27 հազար դրամ, այլ՝ 35 հազար դրամ, բայց տունը միևնույնն է չի տաքանալու, որովհետև այդ տանը կան բազմաթիվ խնդիրներ, սկսած պատուհաններից, դռներից և վերջացրած պատերով և այդպես շարունակ»։

Նա հիմնավորեց, որ շատ ծախսելուց հետո էլ տունը չի տաքանում, քանի որ «տունը տաքացնելու համար մեծ հաշվով պետք է ծախսեն ավելի քիչ՝ 18 հազար դրամ և ներդրումներ անեն , որպեսզի բնակարանը էներգետիկ առումով ամբողջությամբ վերափոխվի»։

 Նա բացատրեց, թե թոշակառուի օրինակով պարզել է, որ տան վրա էներգախնայող ներդրումներ անելուց հետո ավելի քիչ կծախսեն էլեկտրաէներգիայի վրա, բայց կտաքանան։

 «Սա է էներգետիկ փերափոխման իմաստը, որը շատ բարդ թեմա է»,- ասաց Փաշինյանը և նշեց, որ այն լուծելու համար շատ լուջ վերլուծական և ինտելեկտուալ ներուժ է անհրաժեշտ։