Կառավարությունը 18 մլն-ի արտոնություն տվեց «Ջերմուկ գրուպ»-ին՝ 7 աշխատատեղ բացելու համար

Գործադիրն այսօրվա նիստում չզեկուցվող որոշումների փաթեթով «Ջերմուկ գրուպ»-ին 18 մլն դրամի մաքսային ատրոնություն տվեց:

Նախագծի հիմնավորման մեջ ասվում է.

 «Ջերմուկ գրուպ» փակ բաժնետիրական ընկերության կողմից ներմուծվող ապրանքները նախատեսվում է օգտագործել վերջինիս կողմից թողարկված արտադրանքը տեղափոխելու (արտահանելու) նպատակով։

Ծրագիրն իրականացվելու է ՀՀ Վայոց Ձորի մարզում։ Ընկերությունը հիմնադրվել է 1996 թվականին։

Ներդրումային ծրագրի շրջանակներում նախատեսվում է իրականացնել 224.4 մլն դրամի ներդրում հիմնական միջոցների ձեռքբերման համար։

Ներկայումս առկա է 558 աշխատատեղ՝ 577 հազ դրամ միջին ամսական աշխատավարձով։ Նախատեսվում է ներդրումային ծրագրի շրջանակներում, մինչև 2026 թվականը ընկած ժամանակահատվածում, աշխատատեղերի թիվը հասցնել մինչև 565-ի՝ 580 հազ դրամ միջին ամսական աշխատավարձով։

Արտոնություն ստանալու համար ներկայացված ապրանքների արժեքը կազմում է 224.4 մլն դրամ: Մաքսատուրքից ազատման արտոնությունը գնահատվում է 18 մլն դրամ։

Ընկերությունը նախատեսում է ցանկում ներկայացված ապրանքները ներմուծել «Ինեկոբանկ» փակ բաժնետիրական ընկերության (այսուհետ՝ Լիզինգատու կազմակերպություն) միջոցով՝ պայմանով, որ ապրանքները ներմուծելուց հետո, այն հանձնելու է «Ջերմուկ գրուպ» ՓԲ ընկերությանը ներդրումային ծրագրի իրականացման համար։

Ներմուծվող ապրանքները չեն ներմուծվում ԵԱՏՄ անդամ-երկրներից, քանի որ չեն բավարարում ընկերության տեխնիկական պահանջներին»։