Երեխաների ագրեսիան քչացել է. ծափաթաղցի Տիգրանի քույր–եղբայրները Ամանորը ՀՕՖ-ում են նշել

ՀՀ Գեղարքունիքի մարզի Ծափաթաղ գյուղում սպանված 3 տարեկան Տիգրան Օվանեսովի քրոջ և 3 եղբայրների հոգեբանական վիճակը քիչ–քիչ կայունանում է։ Երեխաներն Ամանորը Հայ օգնության ֆոնդի «Մարդիգյան» երեխաների պաշտպանության կենտրոնում են դիմավորել։ Sputnik Արմենիայի հետ զրույցում այս մասին ասաց կենտրոնի գործադիր տնօրեն Միրա Անտոնյանը։

Նոյեմբերի 4–ին հայտնի դարձավ, որ Գեղարքունիքի մարզպետի աշխատակազմի նախաձեռնությամբ խնամակալության և հոգաբարձության մարմինը հրատապ նիստ է հրավիրել, և Օվանեսովների ընտանիքի երեխաներին անհապաղ տեղափոխել ՀՕՖ։
«Երեխաների վարքի, հոգեբանական վիճակի մեջ դրական փոփոխություններ կան։ Շփոթ, քաոս վիճակն անցել է, հասկանում են հրահանգները, կարողանում են կոգնիտիվ մակարդակում ճիշտ դրսևորել իրենց, ավելի քիչ են հարձակում մյուս երեխաների վրա, ավելի քիչ ագրեսիա են ցուցաբերում։ Խաղաղ են, հանգիստ են, համեմատաբար լավ են»,–ասաց Անտոնյանը։

Հարցին, թե մոր կամ ընտանիքի մյուս անդամների կողմից հետաքրքրվածություն կա՞ երեխաների հանդեպ, երեխաներին այցելո՞ւմ են, Անտոնյանը նշեց, որ ոչ հաճախ, բայց մայրն այցելում է։ Այս ընթացքում ընտանիքի մյուս անդամներից ոչ մեկը երեխաներին չի այցելել։
Անտոնյանի խոսքով` խոցելի է մնում այն երեխայի վիճակը, որն ականատես է եղել, թե ինչպես է հայրը խեղդամահ անում Տիգրանին։
«Չնայած տղայի վիճակն ավելի խոցելի է, բայց կամաց–կամաց կարգավորվում է, ինքնակառավարումը մեծացել է, չէի ասի շատ, բայց որոշակի դրական տեղաշարժ կա։ Նրա ագրեսիան պակասել է։ Իհարկե երեխան չի խոսում, մեզ չեն ասել պատճառը, միայն գիտենք, որ հոգեբուժական սահմանային վիճակում է։ Սահմանային վիճակները հենց դրանով են բնութագրվում` վերջնական ախտորոշում չեն` կախված միջավայրից կարող են խորանալ, կամ ընդհակառակը։ Հիմա քանի որ երեխաներն ավելի բարենպաստ միջավայրում են գտնվում, ավելի հանգիստ են, սահմանային վիճակը տեղի է տալիս»,–ասաց Անտոնյանը։

Շարունակությունը՝ սկզբնաղբյուրում։