«Մուրացանի հոսպիտալի» մոտ ժամկետային զինծառայողների հարազատներն են. (տեսանյութ)

«Մուրացանի զինվորական հոսպիտալ»-ի դիմաց այսօր՝ ապրիլի 4-ին հավաքվել էին ժամկետային զինծառայողների ծնողներն ու հարազատները:

Նրանց մի մասն արդեն մի քանի օր լուր չի ստացել իր զինվորից, մյուսներն արդեն տեղեկատվություն էին ստացել, որ իրենց ծառայողն այժմ հոսպիտալում է, և բոլորն եկել էին պարզելու, թե արդյոք հոսպիտալ տեղափոխվածների ցուցակում կա իրենց զինվորի անունը:

Newspress.am-ի հետ ժամկետային զինծառայող Խաչիկ Խաչատրյանի մայրն ասաց, որ արդեն 3 օր է տեղեկություն չունեն իրենց տղայից:

«Շաբաթ օրը զանգեց, ասեց, պոստից իջել եմ, գնամ ճաշարան` կզանգեմ, ու մինչև հիմա տեղեկություն չունենք»,-ասաց կինը՝ հավելելով, որ տղան Թալիշում է եղել:

Նրա խոսքով՝ իր որդու ծառայակից ընկերը այժմ «Մուրացանում» է:

Մեկ այլ զինծառայող՝ 18-ամյա Հայկ Թորոսյանն էլ այժմ հոսպիտալի վերակենդանացման բաժանմունքում է: Հայրը՝ Դավիթ Թորոսյանը պատմեց, որ տղան վիրավորվել է ապրիլի 1-ին ու հենց նույն օրն էլ նրան ուղղաթիռով տեղափոխել են Երևան:
«Կոմայի մեջ է, բժիշկներն ասում են, որ ռակցիա ունի, սակայն անհաղորդ է. որևէ արձագանք չի տալիս»,-ասաց զինծառայողի հայրը՝ հավելելով որ Հայկը գլխուղեղից է վիրավորվել:

Ծնողներից շատերը չէին կարողանում, կամ չէին ուզում խոսել տեսախցիկի առաջ, սակայն մեզ հետ զրույցում պարզ դարձավ, որ զինծառայողների մեծ մասը վիրավորում է ստացել Մարտակերտում և Մատաղիսում:

Նկատենք, որ այսօր հոսպիտալ են այցելել նաև ԱԺ խորհրդարանական բոլոր խմբակցությունների ներկայացուցիչները, ովքեր հանդիպել են ղարաբաղա-ադրբեջանական ուժերի շփման գծում մարտական գործողությունների հետևանքով վիրավորում ստացած զինծառայողներին, ծանոթացել նրանց առողջական վիճակին, խոսել բժիշկների հետ:
Հոսպիտալ է այցելել նաև ՀՀ նախագահ՝ Սերժ Սարգսյանը:

Մանրամասները՝ տեսանյութում